Búgin -Halyqaralyq demokratııa kúni
ASTANA. 15 qyrkúıek. QazAqparat - Búgin - Halyqaralyq demokratııa kúni. Bul ataýly kún BUU Bas Assambleıasynyń 2007 jylǵy 13 jeltoqsandaǵy Úkimetterdiń demokratııany damytý men nyǵaıtýdaǵy kúsh-jigerlerin qoldaýǵa arnalǵan qararynda (№A/RES/62/7) jarııalanǵan bolatyn.
2008 jyldyń 15 qyrkúıeginen bastap atap ótilip keledi.
Halyqaralyq demokratııa kúni Jańa jáne qaıta jańǵyrǵan demokratııa elderiniń halyqaralyq konferentsııasynyń usynysy boıynsha 1997 jylǵy Demokratııa týraly ortaq deklaratsııa qabyldanýyna baılanysty bekitilgen. Qararda BUU-ǵa múshe elderge, úkimettik jáne úkimettik emes uıymdarǵa, jeke tulǵalarǵa bul kúndi qoǵamnyń habardarlyǵyn arttyrý maqsatynda atap ótý usynylady. Qarar BUU Bas hatshysyn BUU-nyń Halyqaralyq demokratııa kúnin atap ótý úshin sharalar qabyldaýǵa shaqyrady.
Pan Gı Mýn óziniń 2009 jylǵy 15 qyrkúıektegi joldaýynda: «Demokratııa óz-ózinen mańyzdy bolyp qoımaıdy - bul áleýmettik-ekonomıkalyq ilgerileýge yntalandyrýshy qýatty kúsh, halyqaralyq beıbitshilik pen qaýipsizdikti qoldaý, sondaı-aq negizgi quqyqtar men bostandyqtardy syılaý da», - dep atap kórsetken bolatyn.
