Búgin - Halyqaralyq bıologııalyq áralýandyq kúni

BUU Bas Assambleıasy 2000 jylǵy 30 jeltoqsanda 22 mamyrdy Halyqaralyq bıologııalyq áralýandyq kúni dep jarııalady, sondaı-aq osy kúni Bıologııalyq áralýandyq týraly konventsııa qabyldandy.

Buǵan deıin atalmysh kún 29 jeltoqsanda atalyp ótiletin. Qazaqstannyń ekologııalyq júıesi biregeı bıologııalyq áralýandyǵymen erekshelenedi. Jalpy Qazaqstanda ósimdikterdiń 15 myńǵa jýyq túri bar. Onyń 2 myńnan astamy baldyrlar, 5 myńǵa jýyǵy sańyraýqulaqtar, 600-ge jýyǵy qynalar, 500-ge jýyǵy múk tárizdiler jáne 6 myńnan astamy joǵary satydaǵy tútikti ósimdikter.

Joǵary satydaǵy ósimdikterdiń túr baılyǵy, ıntrodýktsııalanǵan, mádenı daqyldar men kezdeısoq ákelingen 500-den asa túrlerin qospaǵanda, 161 tuqymdasqa jáne 1120 týysqa jatatyn 6 myńnan astam túrden turady. Onyń ishindegi 730 túr tek Qazaqstanda ósetin - endemıkter.

Qazaqstan janýarlarǵa da óte baı. Sútqorektiniń 180, qustyń 500, baýyrymen jorǵalaýshylardyń 52, qosmekendilerdiń 12, balyqtyń 104-ke jýyq túri meken etedi. Al omyrtqasyz jándikter, shaıan tárizdiler, ulýlar, qurttar budan da kóp. Tek jándikter túrleriniń ózi 30 myńnan asady. Qazaqstannyń «Qyzyl kitabyna» engizilip, qorǵaýǵa alynǵan ańdardyń 40, qustyń 56, baýyrymen jorǵalaýshylardyń 10, qosmekendilerdiń 3, balyqtyń 16 túri bar.

Qazaqstannyń bıologııalyq áralýandyǵyn saqtaý maqsatynda 1994 jyly Bıologııalyq áralýandyq jónindegi konventsııa bekitilip, bıologııalyq áralýandyqty saqtaý jáne birqalypty paıdalaný jónindegi ulttyq strategııa men is-áreketter jospary jasaldy. Búgingi tańda osy jumystar 2003 jylǵy jeltoqsanda Elbasy qol qoıǵan - Qazaqstannyń 2004-2015 jyldardaǵy ekologııalyq qaýipsizdigi konventsııasy sheńberinde atqarylýda.