Búgin Halyqaralyq beıbitshilik kúni
ASTANA. 21 qyrkúıek. QazAqparat - Jyl saıyn 21 qyrkúıekte atap ótiletin Halyqaralyq beıbitshilik kúni soǵys otyn toqtatý men zorlyq-zombylyqtan bas tartýǵa jappaı shaqyrýmen erekshelenedi.
Halyqaralyq beıbitshilik kúnin BUU-nyń Bas Assambleıasy 1981 jyly bekitken. Ol 2002 jyldyń 21 qyrkúıeginen atap ótiledi. Halyqaralyq beıbitshilik kúnin dál osy kúni merekeleý týraly sheshim BUU Bas Assambleıasynyń 55-shi sessııasynda (2001 jylǵy 28 qyrkúıegindegi №A/RES/55/282 arnaıy qarary) qabyldandy.
Barlyq elderge osy kúni áskerı áreketter ótkizýden tartyný usynyldy.
Jyl saıyn 21 qyrkúıekte BUU-da Beıbitshilik qońyraýy janynda saltanatpen bastalatyn, túrli is-sharalar ótkiziledi. Saltanatty rásim BUU Bas hatshysynyń arnaý sózimen bastalyp, keıin ol qońyraýǵa urady. Sonan soń bir mınýttyq únsizdik jarııalanady. Keıingi sóz kezegi BUU Qaýipsizdik keńesiniń tóraǵasyna beriledi.
