Búgin Halyqaralyq akkredıtatsııa kúni
ALMATY. 9 maýsym. QazAqparat /Erbol Azanbek/ - Búgin Halyqaralyq akkredıtatsııa kúni. Almatyda osy kúnge oraı «Akkredıtatsııa - retteýshi organdarǵa kómekshi qural retinde» taqyrybynda dóńgelek ústel bolyp ótti. Uıymdastyrýshy - QR Indýstrııa jáne jańa tehnologııalar mınıstrliginiń Tehnıkalyq retteý jáne metrologııa komıteti.
Búgingi kúndi akkredıtatsııa salasy boıynsha basty halyqaralyq uıymdar -IAF, ILAC bastamasymen álemniń birqatar elderinde semınar, konferentsııalar túrinde atap ótý uıǵarylǵan. Osyǵan oraı uıymdastyrylǵan shara barysynda akkredıtatsııanyń jaı-kúıi talqylandy.
Akkredıtatsııa - belgili sáıkestikti baǵalaý salasyndaǵy jumysty oryndaýǵa ótinish berýshiniń quzyrettiligin akkredıtatsııalaý jónindegi organnyń resmı taný rásimi. Búginde Qazaqstanda myńnan astam organdar men zerthanalar sáıkestikti qýattaý jónindegi akkredıtatsııadan ótken.
Sharaǵa Eýropalyq odaqtyń Qazaqstandaǵy ókildigi, Germanııanyń tehnıkalyq áriptestik uıymy, Qazaqstannyń standarttaý ınstıtýty, Qazaqstan Metrologııa ınstıtýtynyń ókileri qatysyp, qazaqstandyq akkredıtatsııanyń halyqaralyq standarttarmen sáıkestigin jetildirý máselesi talqylandy. «Standarttar men tehnıkalyq reglamentterdiń halyqaralyq sáıkestigi, Qazaqstandyq akkredıtatsııany halyqaralyq deńgeıde moıyndaý - bulardyń barlyǵy akkredıtatsııa salasyn jetildirýge yqpal etip otyr. Bulardy oryndamaý Qazaqstannyń halyqaralyq saýda naryǵyndaǵy yqpalyn azaıtady. Sonymen qatar kásipkerler úshin shyǵyn, óıtkeni akkredıtatsııanyń sáıkestiginsiz olar birneshe márte akkredıtatsııadan ótýge májbúr. Bul halyqaralyq saýdanyń damý deńgeıine áser etedi. Bul baǵytta Qazaqstan TMD-da kósh bastaýshy. Alaıda áli de jetildirý jumystary júrgizilýde»,- deıdi Tehnıkalyq retteý jáne metrologııa komıtetiniń ókilderi.
Esterińizge sala keteıik, Qazaqstan TMD elderi arasynda birinshi bolyp, akkredıtatsııa men tehnıkalyq retteý reformalaryn qolǵa aldy. 2008 jyldyń 5 shildesinde «Baǵalaý sáıkestigi salasyndaǵy akkredıtatsııa» týraly QR Zańy qabyldandy. 2008 jyldyń 27 tamyzynda «Ulttyq akkredıtatsııa ortalyǵy» quryldy. Byltyrǵy jyldan beri Qazaqstan zerthanalardyń akkredıtatsııasy boıynsha halyqaralyq áriptestik uıymyna múshe boldy. Atalǵan uıymǵa múshe bolýy úshin sońǵy úsh jylda uıym ókilderi Qazaqstannyń akkredıtatsııa, tehnıkalyq retteý jáne metrologııa salasy boıynsha jiti tekserý jasaǵan.
