Búgin halyq sózin aıtady, erteń biz onyń qandaı nıet bildirgendigin bilemiz - halyqaralyq baqylaýshy
ASTANA. 3 sáýir. QazAqparat /Jasulan Amanbaıuly/ - Búgin halyq sózin aıtady, erteń biz onyń qandaı nıet bildirgendigin bilemiz.
Búgin, 3 sáýir kúni elimizde ótip jatqan QR Prezıdentiniń kezekten tys saılaýyna qatysty Astanada uıymdastyrylǵan brıfıngte halyqaralyq baqylaýshy, Ispanııa Parlamentiniń senatory Haver Markes Lopes osylaı atap kórsetti.
Onyń aıtýynsha, búgingi kúnniń birinshi jartysy demokratııalyq turǵyda óte qyzý boldy. «Saılaýdaǵy halyqtyń kelýi óte joǵary deńgeıde, ásirese keıbir saılaý ýchaskelerindegi áıelder men jastardyń paıyzdyq turǵydan alǵandaǵy belsendiligi joǵary ekendigin atap ótken jón. Naýqan barysyn qadaǵalap otyrǵan túrli saıası kúshterdiń ókilderimen bolǵan suhbattyń negizinde saılaý úderisi kezinde biz eshqandaı qaqtyǵys jaǵdaılary oryn alǵan joq dep aıta alamyz. Saılaý oryndarynda qaýipsizdik kúshteriniń bolmaǵandyǵyn aıtqymyz keledi. Saılaý ýchaskelerinde qaýipsizdik kúshterine degen qajettilik bolǵan joq»,-dedi ol.
«Saılaýshylardyń kelýi jáne ketýi eshqandaı jaǵymsyz jaǵdaılarmen súıemeldengen joq. Saılaýshylardyń daýys berý quqyǵyna keri áserin tıgizetin qandaı da bir qorqytyp-úrkitý áreketteri bolmady. Basqa saıası partııalardyń ókilderi saılaý úderisin baqylaýǵa jáne qadaǵalaýǵa erkin múmkindik aldy»,-dep atap kórsetti H. Lopes.
«Osylaısha biz saılaý naýqanynda saılaý úderisine nuqsan keltiretin áreketter múldem bolǵan joq degen baǵa berip otyrmyz»,-deıdi Ispanııa senatory.
Onyń aıtýynsha, erteń Ispanııa delegattary saılaý jáshikteriniń ashylýyna qatysyp, daýystardy sanaý úderisine qatysady. «Búgin halyq sózin aıtady, erteń biz onyń qandaı nıet bildirgendigin biletin bolamyz»,-dedi ol.
