Búgin fýtboldan Premer-lıga komandalarynyń segizinshi týry bastalady

ASTANA. QazAqparat - Búgin fýtboldan Premer-lıga komandalary arasyndaǵy el birinshiliginiń 8-týry bastalady, dep habarlaıdy QazAqparat tilshisi.

Atalǵan týr 6 jáne 7 mamyr kúnderi ótedi. Búgin 4 oıyn bolsa, erteńge qalǵan 3 kezdesý belgilengen.

Búgin, 6 mamyrda saǵat 17:00-de «Aqtóbe» men «Aqsý» (Pavlodar oblysy), «Tobyl» (Qostanaı) men «Qaırat» (Almaty) komandalary segizinshi týrdyń shymyldyǵyn túredi.

Al 19:00-de «Astana» men «Maqtaral» (Túrkistan oblysy) kezdesse, 21:00-de «Ordabasy» (Shymkent) men «Qaısar» (Qyzylorda) sheberlik baıqasady.

7 mamyrda 15:00-de «Jetisý» (Taldyqorǵan) men «Oqjetpes» (Kókshetaý) oınasa, 17:00-de «Kaspıı» (Aqtaý) men «Atyraý» jasyl alańǵa shyǵady.

Atalǵan týrdy saǵat 19:00-de «Shahter» (Qaraǵandy) men «Qyzyljar» (Petropavl) komandalary túıindeıdi.

Eske salsaq, fýtboldan birinshi lıgada «Elimaı» «Turannan» basym tústi.