Búgin fýtboldan Premer-lıga komandalarynyń 21-týr oıyndary bastalady
ASTANA. QazAqparat - Búgin fýtboldan Premer-lıga komandalary arasyndaǵy el birinshiliginiń 21-týry bastalady, dep habarlaıdy QazAqparat tilshisi.
Atalǵan týr 1 jáne 2 qazan kúnderi ótedi. Búgin, 1 qazanda úsh oıyn bolsa, 2 qazanda qalǵan tórt kezdesý belgilengen.
Aldymen 1 qazanda saǵat 17:00-de «Kaspıı» (Aqtaý) men «Aqsý» (Pavlodar oblysy) jasyl alańǵa shyqsa, 18:00-de «Ordabasy» (Shymkent) pen «Atyraý», 20:00-de «Taraz» ben «Maqtaral» (Túrkistan oblysy) sheberlik baıqasady.
Al 2 qazanda saǵat 15:00-de «Tobyl» (Qostanaı) men «Shahter» (Qaraǵandy), «Qyzyljar» (Petropavl) men «Qaırat» (Almaty) komandalary kezdesedi.
Sondaı-aq 17:00-de «Aqjaıyq» (Oral) pen «Aqtóbe», 18:00-de «Turan» (Túrkistan) men «Astana» komandalary oınaıdy.
Oıyndar «Qazsport» jáne PFLK-TV arqyly tikeleı efırde kórsetiledi.
Qazir týrnır kestesinde «Aqtóbe», «Astana», «Tobyl» komandalary alǵashqy úshtikte keledi.
Eske salsaq, fýtboldan birinshi lıgada «Oqjetpes» pen «Qaısar» jeńiske jetti.
