Búgin fýtboldan Qazaqstan ulttyq quramasy Avstrııamen kezdesý ótkizedi
ALMATY. Qyrkúıektiń 7-si. QazAqparat /Erbol Turymbetov/ - Búgin fýtboldan Qazaqstan ulttyq quramasy EVRO-2012 irikteý týrlaryndaǵy kezekti Avstrııa quramasymen kezdesýin ótkizedi, dep habarlaıdy QazAqparat.
Alǵashqy matchyn Túrkııadan 3:0 esebimen utylýdan bastaǵan Qazaqstan quramasy Avstrııaǵa 4-i kúni ushyp ketken edi. Búgingi «Red Býl Arena» stadıonynda ótetin oıynǵa 35 jasar horvat Marıo Strahonıa Bas tóreshi bolyp taǵaıyndalǵan. Ol buǵan deıin Qazaqstan ulttyq quramasy men klýbtyq komandalary qatysqan oıyndarǵa tóreshilik jasamaǵan.
Oıynshylary negizinen nemis Býndeslıgasynda óner kórsetetin Avstrııa quramasynda Ekrem Dag («Beshıktash», Túrkııa), Sebastıan Predl («Verder», Germanııa), Devıd Alaba («Bavarııa», Germanııa), Martın Harnıkter («Shtýtgart», Germanııa) búgin bizge qarsy oınaıdy. Bas bapkerleri - Dıdı Konstantını.
Jalpy, qos komanda buryn sońdy kezdespegen. Tek, 2009 jyly 19 jasqa deıingiler arasynda Evropa Birinshiliginiń irikteý syndarynda eki eldiń áıelder quramasy kezdesken edi. Ol oıyn 2:1 esebimen qarsylastar paıdasyna sheshilgen bolatyn. Sonymen qatar, 2003 jyly «Intretota» kýbogi jolynda qazaqstandyq «Tobyl» klýby men avstrııalyq «Pashıng» komandalary oınady. Óz alańynda ótken birinshi oıynda «Tobyldyqtar» 0:1 esebimen ese jiberse, qarymta oıynda da 0:3 esebimen jeńilis tapqan edi.
Búgingi oıynnan «Habar» arnasy Astana ýaqytymen 00:15-te tikeleı kórsetilimin bastaıdy.
