Búgin fýtbol oıyndarynyń tarıhynda alǵash ret ysqyryq paıdalanylǵan kún
ASTANA. 10 shilde. QazAqparat - 134 jyl buryn dál osy kúni, ıaǵnı 1878 jyldyń 10 shildesinde Anglııada fýtbol tóreshisi alǵash ret ysqyryqty paıdalandy.
Fýtbol alańynda tóreshi tek 1873 jyly ǵana paıda boldy. Ol kezde tóreshiniń oıynǵa óz betimen aralasýyna tyıym salynǵan bolatyn. Olardyń mindetine oıynnyń ýaqytyn qadaǵalaý, match týraly jazý, oıynshylardy alańnan shyǵarý jáne taǵaıyndaý, sondaı-aq ózara kelise almaǵan jaǵdaıda komandalar ókilderiniń daýlaryn sheshý kirdi. 1878 jylǵa deıin fýtbol tóreshilerinde ysqyryqtar bolmaǵan. Olar óz daýystaryna nemese qońyraýlardyń kómegine júgindi. Sondaı-aq ózderine nazar aýdartý úshin túrli belgiler berýge májbúr bolyp keldi.
Ysqyryqtyń paıdalanýǵa engizilýi qyzyqty oqıǵamen baılanysty. Ol kezde oıynǵa tórelik etý kásibılerge emes, áýesqoılarǵa tapsyrylatyn. Fýtboldy súıetin jáne oǵan aqsha tólenbeıtin áýesqoı tóreshi kásibı mamanǵa qaraǵanda barlyǵyn jaqsy isteıdi dep sanalǵan. Tórelikke dárigerler, jazýshylar jáne basqa da mamandyq ıeleri shaqyrylyp otyrdy. Artýr Konan Doıl da óz kezinde fýtbol arbıtri bolǵany belgili.
Al 1878 jyldyń 10 shildesinde oıynǵa tórelik etý polıtseıge senip tapsyryldy. Ol oıyn barysynda tóbeles shyqqan kezde kóp oılanbastan ysqyryqty paıdalandy. Úreıleri qashqan jáne ony kútpegen oıynshylar jaǵajyrtysty birden toqtatty. Sodan bastap tóreshiler alańǵa ysqyryqpen shyǵatyn boldy.
