Búgin - Farıza Ońǵarsynovanyń týǵan kúni
ASTANA. QazAqparat - Búgin qazaqtyń aqyn qyzy, jýrnalıst, halyq jazýshysy, Qazaqstan Respýblıkasy Memlekettik syılyǵynyń laýreaty Farıza Ońǵarsynovanyń (1939-2014) týǵan kúni, dep habarlaıdy QazAqparat.
Tiri bolǵanda poezııa patshaıymy 78 jasqa tolar edi.
Farıza Ońǵarsynova 1939 jyly Atyraý oblysynda týǵan. 1961 jyly Atyraý memlekettik pedagogıka ınstıtýtyn bitirip, eńbek jolyn aýyldyq mektepte muǵalim bolyp bastaǵan.
1966-1969 jyldary - «Kommýnıstik eńbek» oblystyq gazetiniń ádebı qyzmetkeri, 1969-1977 jyldary - «Lenınshil jas» («Jas Alash») gazetiniń Atyraý, Aqtóbe, Oral oblystary boıynsha menshikti tilshisi, «Qazaqstan pıoneri» gazetiniń redaktory bolǵan. 1978 jyly - «Pıoner» jýrnalynyń bas redaktory bolyp taǵaıyndalǵan.
Alǵashqy kitaby «Sandýǵash» 1967 jyly jaryq kórgen. Odan bólek, «Melodııa», «Bespokoınaıa pora», «Gordoe pokolenıe», «Kógershinderim», «Trevogı», «Ojıdanıe solntsa», «Ozarenıe» jyr jınaqtaryn, «Bıiktik» ocherkter jınaqtaryn shyǵaryp, «Bizdiń Kámshat» povesin, Á.Tájibaev, M.Maqataev, chılı aqyny Pablo Nerýdyń shyǵarmashylyqtary týraly ádebı-syn maqalalar jazǵan. S.Vangelıdiń «Prıklıýchenııa Gýgýtse», «Dedýshkın mınıstr» balalarǵa arnalǵan povesterin, S.Kapýtıkıannyń, E.Evtýshenkonyń, R.Kazakovanyń, arab aqyny Ábdýrahman ál-Hamısıdiń óleńderin, P.Nerýdyń kitaptaryn qazaqsha aýdarǵan.
Aqynnyń kóptegen shyǵarmalary shet tilderge aýdarylǵan. Qazaqstan Respýblıkasy Parlamenti Májilisiniń birinshi jáne ekinshi shaqyrylymynyń depýtaty. «Qurmet belgisi», «Parasat» ordenderimen, medaldarmen marapattalǵan.
2014 jyly aqyn 75 jasqa qaraǵan shaǵynda qaıtys boldy.
Foto kopilkaurokov.ru
