Búgin elordalyqtarǵa «Ulystyń Uly kúni - Naýryz» kontserti tartý etilmek
ASTANA. QazAqparat - Naýryz merekesi qarsańynda Astana qalasynyń Tilderdi damytý basqarmasy elorda turǵyndary men qonaqtaryna erekshe syı - «Ulystyń Uly kúni - Naýryz» merekelik kontsertin tartý etpek. Bul týraly elorda ákimdiginiń resmı saıtynda habarlanǵan.
Uıymdastyrýshylardyń habarlaýynsha, keshtiń basty maqsaty - tarıhymyzdan dástúr, ata-babamyzdan salt bolyp kele jatqan Uly merekemiz Naýryzdy kópshiliktiń toılaýyna yqpal etý. Kontsert Astanadaǵy birqatar merekelik is-sharalardyń bastaýy bolady. Sahna tórinde qazaqtyń belgili dástúrli ánshileri Erlan Rysqalı, Klara Tólenbaeva, Danııar Muqanov, Marjan Arapbaeva, Jańabaı Ótegenov án shyrqaıdy. Sondaı-aq belgili aıtys aqyndary kópshilik aldyna Balǵynbek Imashev pen Jandarbek Bulǵaqov merekelik aıtyspen shyqpaq. Al «Naz» teatrynyń bıshileri kórermender úshin bı bılese, «Serper» dombyrashylar toby qazaq kúılerinen poppýrı usynady. Esterińizge sala keteıik, merekelik shara saǵat 17.00-de bastalady. Kirý tegin.
