Búgin elordadaǵy Agrarlyq ýnıversıtette Halyqaralyq áıelder kúnine arnalǵan merekelik shara ótti

Oqý orny qabyrǵasynda jumys isteıtin áıelder qaýymyn rektor Aıtbaı Bulashev quttyqtady.

Ýnıversıtet basshysy atap ótkendeı, kóktemniń alǵashqy shýaqty kúnderi náziktiktiń, mahabbattyń belgisi áıelder merekesimen bastalady. «Jer betinde áıel zatyn qazaǵymyzdaı dáriptep, qasterleıtin halyq joq shyǵar, sirá. Sebebi, «birinshi baılyq - densaýlyq, ekinshi baılyq - aq jaýlyq», dep qyzyn tórge otyrǵyzyp, sulý áıeldi jeti qazynanyń birinen eseptegen, al balalaryn «jumaq - anańnyń tabanynyń astynda», dep tárbıelegen halyq, dedi ol.

Áıel - názik jandy atalǵanymen, kóptegen salalarda jumysta erlerge des bermeıdi. «Áıelder qaýymyn ekonomıkanyń barlyq salasynda kezdestirýge bolady. Sondyqtan, elimizdiń egemendiginiń baıandylyǵy, ekonomıkasynyń damýy sizderge tikeleı baılanysty desek, artyq aıtqandyq bolmas», - dedi oqý ornynyń basshysy.

Rektordyń aıtýynsha, búginde ýnıversıtte 879 áıel jumys isteıdi, bul ujymnyń barlyq sanynyń 70 paıyzy.

Merekelik kontserttik baǵdarlamany ánshi, kompozıtor Qaırat Baekenov pen «Format» toby ázirledi. Baǵdarlamada naýryz aıyna, kóktemge, analar men mahabbatqa arnalǵan ánder molynan boldy. Qazaq, orys tilderinde halyq jáne búgingi kúnniń ánderi, sondaı-aq aǵylshyn tilinde zamanaýı áýender shyrqaldy. Kórermenderge jasalǵan tosyn syı -Qaırat Júnisovtyń sózine jazylǵan Q.Baekenovtyń qazaq tildegi jańa «Bolashaq» áni boldy.