Búgin elordada jańajyldyq is-sharalar bastalady
ASTANA. Jeltoqsannyń 19-y. QazAqparat - Elordada jeltoqsannyń 19-y men 31-i aralyǵynda Jańa jylǵa arnalǵan saltanatty is-sharalar ótedi. Qalalyq ákimdiktiń baspasóz qyzmetiniń bergen kestesine sáıkes, búgin Kongress-Holl saraıynda alǵashqy is-shara - Jańajyldyq syılyqtar kórmesi ashylady,
dep habarlaıdy QazAqparat.
Jetimder, múmkindigi shekteýli balalar, sonymen qatar áleýmettik jaǵynan turmysy tómen, kópbalaly januıalardyń balalary úshin elordanyń aýdandyq ákimdikteri jeltoqsannyń 20-sy men 22-si aralyqtarynda jáne 24-inde jańajyldyq shyrsha ótkizedi. Al Jastar saraıy jeltoqsannyń 23-i men 30-y aralyǵynda bı keshterin uıymdastyrýǵa daıyndyq jumystaryn júrgizýde.
Jeltoqsannyń 24-inde Esil ózeniniń jaǵalaýynda jáne «Kóktal» turǵyn úı alabynyń mádeınet úıine qarsy alańdarda, «Óndiris» turǵyn úı alabyndaǵy № 23 orta mektep aýmaǵynda Saryarqa aýdany orta mektepteriniń arasynda qardan soǵylǵan músindermen aýdan aýmaǵyn bezendirý baıqaýy ótedi.
Jeltoqsannyń 25-inde astanalyq tsırkte «Muzdaǵy tsırk» atty reseılik jańajyldyq qoıylym bastalady. Al jeltoqsannyń 27-si men 30-y aralyǵynda Beıbitshilik jáne kelisim saraıynda Jasóspirimder teatrynda jańajyldyq balalar erteńgiligi ótedi.
Jeltoqsannyń 25-inde osy saraıdaǵy «Atrıým» zalynda daryndy jetim balalarǵa arnalǵan Prezıdenttik shyrsha bolady, al keshki saǵat 7-de Táýelsizdik saraıynda Astanalyq bal ótedi.
Elordada uıymdastyrylatyn barlyq Jańa jylǵa arnalǵan is-sharalarmen qalalyq ákimdiktiń resmı saıtynan tanysýǵa bolady.
