Búgin elordada barlyq qoldanystaǵy aqparattardy eki túrge bólgen elimizdiń jańa zań jobasy talqyǵa tústi

«Qazaqstan Respýblıkasynda aqparatqa qol jetkizý: jaǵdaıy men bolashaǵy» atty halyqaralyq ǵylymı-tájirıbelik konferentsııa aıasynda atalǵan zań jobasyn tanystyrǵan el Parlamenti Májilisiniń depýtaty Jaqyp Asanovtyń aıtýynsha, jarııa aqparatqa qol jetimdilikti qamtamasyz etý zańdylyq, jarııa aqparattyq ashyqtyǵy men qoljetimdiligi, aqparat ıegeri qyzmetiniń jarııalylyǵy, jeke ómirge, jeke jáne otbasy qupııasyna eshkimniń qol suqpaýy, jarııa aqparatty durystyǵy men tolyqtyǵy, jarııa aqparatty ýaqytyly tabys etý, jarııa aqparat alý men taratý quqyǵyn buzǵany úshin jaýaptylyq prıntsıpterine negizdelgen. Sonymen qatar qujatqa sáıkes qoldanystaǵy barlyq aqparattar qoljetimdiligi shekteýli jáne jarııa aqparattar bolyp ekige bólingen. Qoljetimdiligi shekteýli aqparatqa memlekettik qupııalar, kommertsııalyq jáne kásibı qupııalar, azamattardyń jeke ómiri, sondaı-aq jarııalanýy zańmen shektelgen basqa da aqparattar jatady. Aqparattyń bul túri jańa zań jobasynda qarastyrylmaıdy ári basqa zańdarmen retteledi. Al qalǵan aqparattar qoǵam úshin ashyq dep tanylady.

Sondaı-aq zań jobasy aqparatty paıdalanýshy men aqparat ıegerin de naqtylaı túskendigin aıtqan depýtat «biz aqparat ıegerin mynadaı úlgide naqtylaýǵa sheshim shyǵardyq. Memlekettik organdar men jergilikti ózin ózi basqarýshy organdarmen qatar bıýdjet qarajatyn paıdalanatyn bıznes sýbektileri, tabıǵı resýrstardy paıdalanatyn ári sáıkesinshe aqparatqa ıe domınant monopolıster, sýbektiler jáne de memlekettiń qatysy bar kásiporyndar, ulttyq kompanııalar jáne basqa da qurylymdar aqparat ıegeri bolady», dedi.