Búgin Elordada «Altyn dombyraly» aıtys ótedi
ASTANA. 8 jeltoqsan. QazAqparat - Búgin Astanada Kongress-holl saraıynda «Altyn dombyraly» aıtys ótedi, dep habarlaıdy kazaitys.kz.
Esterińizde bolsa, ótken jyly Táýelsizdik merekesi qarsańynda QR Mádenıet jáne aqparat mınıstirliginiń uıymdastyrýymen "Bizdiń el osyndaı" dep atalatyn aıtys ótken. Aıtýly alamannyń Bas júldesine altyn dombyra tigilgenin de eshkim umytpaǵan shyǵar. Sol aıtys bıyl atalmysh mınıstirlik pen "Nur Otan" partııasynyń tikeleı qoldaýymen "Jyryń bolyp tógilemin, elim!" degen atpen jalǵasyn tappaq!
Ótken jylǵy aıtystyń tártibinde "júldege tigilgen altyn dombyra Táýelsizdikke arnalyp jyl saıyn ótkiziletin aıtystan qatarynan úsh ret Bas júldege alǵan aqynǵa túbegeıli beriledi, oǵan deıin mýzeıde saqtala turady" delingen bolatyn. Altyn dombyra qazir sol aıtystyń Bas júldesin alǵan Muhtar Nııazovtyń atynda mýzeıde saqtalyp tur.
Sonymen, bul aıtysqa kimder qatysady? Olar qalaı anyqtaldy? Endi soǵan keleıik.
Ótken jyly aıtysta oblystarda irikteý ótip, sol báıgeden ozyp kelgen aqyndardy altyn dombyraly aıtysta baq synaǵan bolatyn. Bul joly ózgeshe tásil tańdaldy. Byltyrǵy 9 jeltoqsandaǵy "Bizdiń el osyndaı" aıtysynan qazirge deıingi bir jyl ishinde ótken Respýblıkalyq aıtystarda Bas júlde alǵan aqyndar arasynda reıtıng jasap 10 aqyndy iriktep otyrmyz. Bir jyl ishinde Respýblıkalyq aıtystarda Bas júlde alǵan aqyndardyń I, II, III oryndary da bal boıynsha eseptelip sońynda jalpy bal shyǵaryldy. Munda Bas júlde 4 upaı, 1-oryn 3 upaı, 2-oryn 2 upaı, 3-oryn 1 upaıǵa esepteldi.
Sara Toqtamysova, Muhtar Nııazov, Balǵynbek Imashev, Bekarys Shoıbekov, Nurmat Mansurov, Jandarbek Bulǵaqov, Dıdar Qamıev, Aınur Tursynbaeva, Qanat Myrzahanov, Jaqsylyq Orynbasar.
Bıletter Kongress-holl kassasynda satylady.
