Búgin elorda jurtshylyǵy aqyn Farıza Ońǵarsynovany aqtyq saparǵa shyǵaryp salady
Farıza apamyzdyń ómirden ozýyn estigennen beri «QazAqparat» halyqaralyq aqparat agenttiginiń jańalyqtar taspasynda ol kisige arnalǵan kóptegen materıaldar jaryq kórdi. Elimizdiń betke ustar azamattary qazaq jurtshylyǵynyń qabyrǵasyn qaıystyrǵan aýyr qazaǵa oraı aqynnyń týǵan-týystaryna qaıǵyra kóńil aıtyp, agenttik arqyly baquldasyp ta jatyr. Jalpy, qazaq basylymdarynyń barlyǵy da osynaý sýyt habarǵa jedel ún qosyp, elimizge esimi belgili aqyn-jazýshylardyń, qoǵam qaıratkerleriniń Farıza Ońǵarsynqyzymen baquldaýǵa arnalǵan jan tebirenter materıaldaryn jarııalaýda.
Máselen, jazýshy Ábish Kekilbaıuly: «Ótip bara jatqan dáýren-aı deseńizshi. Farıza ekeýmiz bir jyldyń, bir aıdyń tóli edik. Ádebıetke birge kelip, jarysa jazyp edik. Onyń jazǵandaryna óz jazǵanymnan beter qýanýshy edim. Alǵan asýlaryna, shyqqan shyńdaryna eriksiz súısinip, erekshe tamsanatynmyn. Shynynda da, ol tal boıynda bir mini joq uly aqyn edi. Sondyqtan da onyń týyndylary jaryq kórgen boıda qalyń oqyrman qaýymnyń júregine jol tabatyn. Úlken de, kishi de, áıel de, erkek te birdeı qadirlep, tóbelerine kóteretin. Qazaq eliniń qaı túkpirine barsańyz da, ony óz perzentindeı aıalap, álpeshteıtin. Ol el arasynda aqylman Abaıdaı, aldaspan Mahambetteı, aıtqyr Qasymdaı, aqıyq Muqaǵalıdaı aıryqsha qasterlenetin. Naǵyz búkilhalyqtyq mahabbatqa ıe edi. Jurt ony almastaı tilip túser ótkirligi úshin, qara qyldy qaq jarǵan ádildigi úshin, bet qaratpas alapat batyldyǵy úshin ólip-óship jaqsy kóretin», - deıdi qabyrǵasy qaıysa. Sonymen qatar ol halyq mahabbatynyń aıdynynda júzgen aqyn dańqy óziniń jeńimpazdyq jolyn jalǵastyra beretindigin, el súıispenshiligi eselene túsetindigin, óıtkeni Farıza sońyna ólmes, óshpes mura qaldyryp ketkendigin basa aıtady.
Iá, qańtardyń betti qaryp, deneńdi titirkendirer, ón boıyńdy qaltyratar qatal qara sýyǵynan da yzǵarly «Farıza Ońǵarsynova ómirden ozdy» degen sýyt ári sýyq habar jeldeı esip, qazaqtyń búkil dalasyna taraǵannan beri aza tutpaǵan adam joq shyǵar, sirá. Alaıda, Allanyń isine ne shara? Tirshiliktiń zańy sondaı dep jubatamyz ózimizdi. Ras, danyshpan aqynymyz Abaı Qunanbaıuly: «Óldi deýge bola ma, aıtyńdarshy, ólmeıtuǵyn artyna sóz qaldyrǵan» demekshi, Farıza apamyzdyń keshegi daýylpaz Dospambet, shamyrqanǵan Shalkıiz, kárijorǵa Qaztýǵan, aldaspan Aqtamberdi, jalaýger Mahambetterden qalǵan arýaqty da aryndy jyrdyń jalǵasy ispettes óleńderi ǵasyrdan ǵasyrǵa jyr súıer qaýymnyń júreginde máńgi jattalyp qalsa, qazaq ádebıetinde óshpesteı máńgi tańbalanǵan esimi urpaqtar jadynda jańǵyryp otyrary sózsiz.
Atyraý oblysynyń ákimi Baqtyqoja Іzmuhambetov te irilik pen keńdikti, parasat pen paryzdy, mindet pen minájatty teń ustaǵan, qaı kezde de qazaqtyń qany, azamattyń ary úshin kúreske daıyn úlken qoǵam qaıratkeri bolǵan Farıza apamyzdy zor tebirenispen eske alady.
«Asaý ǵasyr! Іrini úgip demiń
bara jatsa sónerdeı úmitterim.
Men tileımin: kúńkil men usaqtyqtan
saqtaǵaı dep dalamnyń jigitterin», - dep jyrlaǵan uly da ult tileýqorynan qapııada kóz jazyp qaldyq. Shúkirlik eterimiz sol, apamyzdyń sońynda ýaqyttyń tozańy qonbas ǵajaıyp mol murasy qaldy. Ol - máńgilik! Ǵasyrdan ǵasyrǵa ótken saıyn jańa qyrymen jarqyraı túser, egemen elimizdiń jas urpaǵynyń jattap óser jasampaz jyryna aınalar», - deıdi ol.
Al synshy, QR Ulttyq ǵylym akademııasynyń akademıgi Serik Qırabaev Farıza Ońǵarsynqyzy eshkimge uqsamaıtyn dara talantymen tanylǵanyn, ol jany súıgendi, súısingenin, túısingenin, kóńili qalyp jeringenin jazǵandyǵyn basa aıta kele: «Farıza adam esebinde de, daryn-talant esebinde de iri, kesek minezdi, jigittiń soıy derlik, erke, batyr qyz edi. Ol ómirdiń usaq-túıegine alańdamady. Іrilikti, márttikti súıdi. Onyń astarynda áıeldik sezimniń baılyǵy jatady. Ol mahabbatty uly sezim sanady. Oǵan bas ıdi. Ony súıe bilýdiń azaby dep uqty. Sezim náziktigin pash etti. Onda jasandylyq joq edi. Oıshyl bolsa, shyndyqty tanı bilýden, muńdy bolsa, aqyndyqtyń bolmysynan derlik. Keıde ózin jalǵyz sezinetin kezderi de az bolmaıtyn. Biraq ol aqynnyń ortasynan, aınalasynan bólinýi emes. Oılarynyń qoldaý tappaı qınalýynan týatyn. Sonyń ózinde ol ómirdi sheksiz súıdi. Óle-ólgenshe azabymen ustamdylyqpen, tabandylyqpen alysty. Farıza bizdiń zamannyń, adamzattyń bıik úlgidegi aqyny bolyp qaldy», - deıdi S.Qırabaev.
Qazaqtyń ulttyq poezııasyna ózindik ózgeshe lep ákelip, erekshe daryn ıesi ekendigin barsha óner súıer qaýymǵa moıyndata bilgen Farıza Ońǵarsynova jaıynda QR Parlamenti Májilisiniń depýtaty Aldan Smaıyl bylaı deıdi: «Fákeń elge eń aldymen aqyn retinde tanyldy. Shyn máninde qazaq poezııasynda Mahambetterge tán úlken jiger saqtalyp kelse, qazaq poezııasynda aıbyn paıda bolatyn bolsa, qazaq ádebıetinde qoǵamdaǵy shyndyq óz qalpynda aıtylyp, synalyp jatatyn bolsa, osynyń bárine Farıza Ońǵarsynovanyń yqpaly óte zor».
Farıza Ońǵarsynqyzynyń aýyr qazasy qazaq ádebıetiniń aldyńǵy tolqynyndaǵy aǵa-apalary, qoǵam qaıratkerlerimen qatar, qolyna qalam alyp, júrekten shyǵar jumyr jyrlary búginge qalyń oqyrmannyń jan dúnıesine jylý syılap úlgergen keıingi tolqyn inilerin de qalyń qaıǵyǵa saldy. Máselen, aqyn, «Ádebıet portalynyń» redaktory Baýyrjan Qaraǵyzuly: «Bir Allanyń adam balasyna qulpyrta bergen tańdaý erkinde óz taǵdyryn ózderi tamyljyta tańdaı qaqtyra jazatyn tek has aqyndar. Qazaq poezııa keńistigindegi Farıza Ońǵarsynova - has aqyn. Ol Óleńnen ózin izdedi. Óleń onyń jan syrlasy, jaqyn muńdasy boldy. Ómir zańdylyǵyna syımaǵan oı tolqyny Óleń bolyp arnasynan asyp-tasyp jatty. Qudaıdyń kudiretimen qaýyzynda móldir sezim men duǵaly oıdyń beınesinde kóringen óner týyndysy uly ýaqyt janarynda ǵasyrlar boıy gaýhar tastaı jarqyrap turady. Ol muńdy júrektegi máńgilik mahabbattyń «tilsiz tilinde» sóıledi», - deıdi.
Júregi názik bolsa da ór minezdi, órshil jyrlarymen, qoǵamǵa sińirgen zor eńbegimen barsha Qazaqstan halqynyń súıikti qyzyna aınalǵan ardaqty apamyzdyń ımany salamat bolyp, jan nury peıishte shalqysyn, jatqan jeri jaıly, topyraǵy torqa bolsyn!
QazAqparat ujymy qazaq eliniń qabyrǵasyn qaıystyrǵan aýyr qazaǵa oraı F.Ońǵarsynovanyń týǵan-týystaryna qaıǵyryp, kóńil aıtady.