Búgin elimizdiń prokýratýra organdarynyń qurylǵanyna 20 jyl toldy

Osyǵan oraı Úkimet úıinde saltanatty jıyn ótip, onda QR Bas prokýrory Ashat Daýylbaev áriptesterin kásibı merekelerimen quttyqtady.

«Aǵymdaǵy jyly prokýratýra organdary jarty mıllıonnan astam qazaqstandyqtyń konstıtýtsııalyq quqyǵyn qorǵap, zańdylyqtyń buzylýynyń shamamen 400 faktisin joıdy. Memlekettik bıýdjetke 27 mlrd. teńgeden astam kiristi qalpyna keltirip, 150 myńnan astam azamattyq eńbek quqyǵyn qorǵady. Bul oraıda 8 mlrd. teńgeden astam somaǵa jalaqy boıynsha qaryzdaryn alýǵa kómek berdi», - dep atap ótti A.Daýylbaev.

Onyń atap ótýinshe, qazirgi tańda el Úkimetiniń tyńǵylyqty qoldaýynyń arqasynda prokýratýra organdarynyń materıaldyq-tehnıkalyq bazasy nyǵaıa tústi. Tek ótken 2 jyldyń ishinde ǵana 24 jańa ǵımarat boı kóterip, 200-den astam ǵımarat jóndeýden ótti.

«Ótken joldardy baǵalaı otyryp, el Prezıdentiniń konstrýktıvti ári sarbdal saıasatynyń arqasynda búgingi tańda Qazaqstan prokýratýrasy jetekshi quqyq qorǵaýshy organǵa aınaldy dep zor jaýapkershilikpen aıtýǵa bolady», - dedi ol.

Saltanatty jıynnyń qorytyndysy boıynsha A.Daýylbaev ortalyq memlekettik organdardyń basshylaryna, prokýratýra organdarynyń ardagerleri men qyzmetkerlerine, sheteldik qonaqtarǵa mereıtoılyq medaldar tabys etti.

Sonymen qatar minsiz qyzmetteri úshin birqatar qyzmetkerge kezekti synyptyq shender men vedomstvolyq nagradalar tabys etildi.