Búgin elimizdiń basym bóliginde jańbyr jaýyp, naızaǵaı oınaıdy - Qazgıdromet
ASTANA. QazAqparat - Qazaqstan terrıtorııasynyń basym bóliginde aýa raıy turaqsyz bolady, keı jerlerde ótkinshi jańbyr jaýyp, naızaǵaı oınaıdy, jel kúsheıedi, tek respýblıkanyń soltústigi men shyǵysynda jaýyn-shashynsyz aýa raıy kútiledi, dep habarlaıdy «Qazgıdromet» RMK.
Almaty, Shyǵys Qazaqstan, kúndiz Jambyl, Ońtústik Qazaqstan oblystarynyń keı jerlerinde jel 15-20 m/s deıin kúsheıip, naızaǵaı baqylanady.
Qyzylorda oblysynyń keı jerlerinde shańdy daýylmen soqqan jel 15-20 m/s kúsheıedi. Mańǵystaý oblysynyń keı jerlerinde jel 15-20 m/s kúsheıip, túnde naızaǵaı baqylanady. Túnde Atyraý oblysynyń keı jerlerinde naızaǵaı baqylanady, kúndiz jeldiń kúshi 15-20 m/s bolady. Aqtóbe, túnde Batys Qazaqstan oblystarynyń keı jerlerinde naızaǵaı kútiledi. Qostanaı, Soltústik Qazaqstan oblystarynyń keı jerlerinde jeldiń kúshi 15-20 m/s bolady, túnde jáne tańerteń tuman baqylanady. Kúndiz Almaty, Jambyl oblystarynda, Qaraǵandy oblysynyń keı jerlerinde qatty ystyq saqtalady. Kúndiz Shyǵys Qazaqstan oblysynda qatty ystyq, keı jerlerinde óte qatty ystyq bolady. Aqtóbe, Qyzylorda, Ońtústik Qazaqstan, Jambyl oblystarynyń basym bóliginde, Batys Qazaqstan, Qaraǵandy, Almaty, Shyǵys Qazaqstan oblystarynyń keı jerlerinde óte joǵary órt qaýpi saqtalady.
