Búgin elimizdiń basym bóliginde aýa raıy qubylmaly bolady

ASTANA. QazAqparat – 26 tamyzda atmosferalyq frontaldy bólikterdiń ótýine baılanysty elimizdiń basym bóliginde aýa raıy qubylmaly bolady. Naızaǵaı oınap, daýyl soǵady, jel kúsheıedi, burshaq jaýýy múmkin, dep habarlaıdy QazAqparat.

Qazgıdromet sınoptıkteriniń boljamy boıynsha, elimizdiń batysynda, ońtústik-batysynda qatty jańbyr jaýady. Al Soltústikte, soltústik-batysta tuman túsedi, ońtústikte shańdy daýyl soǵady.

Túrkistan, Jambyl, Qyzylorda, Aqtóbe oblysynda, Atyraýdyń batysynda, ońtústiginde, shyǵysynda, Qostanaı oblysynyń ońtústiginde, Mańǵystaýdyń batysynda, soltústiginde, ońtústik-shyǵysynda tótenshe órt qaýpi bar.

Batys Qazaqstan oblysynda joǵary órt qaýpi saqtalady, oblystyń ońtústik-batysynda, shyǵysynda tótenshe órt qaýpi bar.

Almaty oblysynyń soltústik jartysynda tótenshe órt qaýpi saqtalady. Jetisý oblysynda joǵary órt qaýpi bar.

Ulytaý, Abaı, Shyǵys Qazaqstan oblystarynda, Qaraǵandy ​​oblysynyń ortalyǵynda órt qaýpi joǵary.