Búgin elimizde Rýhanı kelisim kúni atap ótiledi
ASTANA. 18 qazan. QazAqparat - Búgin elimizde Rýhanı kelisim kúni atalyp ótiledi. 1992 jyldan beri merekelenetin ataýly kúnniń mańyzy zor. Óıtkeni 17 konfessııa men 140 ult ókili turatyn elimiz úshin rýhanı kelisim, turaqtylyq pen tatýlyqtyń orny bólek, dep jazady astana.kz.
«Osy merekege oraı respýblıkanyń túkpir-túkpirinde dóńgelek ústel jıyndary, konferentsııalar, odan bólek dindar adamdar ózderiniń shirkeýlerinde bul máselege baılanysty kezdesýler ótkizedi», - deıdi Mádenıetter men dinderdiń halyqaralyq ortalyǵy Taldaý jumysy bóliminiń basshysy Azamat Jetpisbaev.
Qaqtyǵystar men janjaldarǵa shekteý qoıyp, qaıyrymdylyq pen kómekke shaqyratyn, syılastyq pen birlikti arttyratyn merekeniń mańyzy jyl saıyn artyp keledi. Tipti, ózge din ókilderi de Rýhanı kelisim kúnin asyǵa kútetin kórinedi.
«Pravoslav shirkeýi men Qazaqstan musylmandary basqarmasynyń arasynda áriptestik tyǵyz baılanys ornaǵan. Dinı mereke kúnderi shirkeý, meshitterdi aralap, bir-birimizge jaqsy tilekter aıtamyz. Bul birinshiden adamgershilik qasıettiń joǵary kórsetkishi der edim. Sonymen qatar, Prezıdenttiń alǵa qoıǵan maqsattarynyń oryndalyp, halyqtar arasynda myzǵymas dostyq ornaǵanynyń belgisi»,- dep atap ótti Pravoslav shirkeýi Astanalyq okrýginiń blagochınnyıi arhımandrıt Sergıı (Karamyshev S. L.),
Qazaqstan - táýelsiz, zaıyrly jáne demokratııalyq memleket. Dese de, ózara yntymaqtastyqty kúsheıtýge negizdelgen jıyndar kóptep uıymdastyrylady. Olardyń biregeıi 2003 jyldan beri ótetin Álemdik jáne dástúrli dinder lıderleriniń sezi. Sezd zorlyq-zombylyq, ekstremızm jáne terrorızm sııaqty teris kórinisterdi boldyrmaýdyń aldyn alýǵa zor yqpal etip keledi.
