Búgin - el astanasy Almatydan Aqmola qalasyna kóshirilgen kún
ASTANA. QazAqparat - On jeti jyl buryn QR Prezıdenti Nursultan Nazarbaevtyń 1997 jylǵy 20 qazandaǵy Jarlyǵymen Aqmola qalasy (qazirgi Astana) 1997 jyldyń 10 jeltoqsanynan Qazaqstannyń astanasy bolyp jarııalandy.
Qazaqstan Respýblıkasynyń Joǵary Keńesi astanany aýystyrý týraly sheshimdi 1994 jyldyń 6 shildesinde qabyldaǵan bolatyn. Osydan keıin daıyndyq jumystary júrgizile bastady. Qurylys qarqynyn arttyrý ári ınfraqurylymyn damytý maqsatynda 1997 jyly Aqmola qalasynda (qazirgi Astana) Aqmola arnaıy ekonomıkalyq aımaǵy quryldy. Ol belgili bir deńgeıde jańa elordanyń damýyna óz septigin tıgizdi. QR Prezıdentiniń astanany kóshirý týraly Jarlyǵy jaryqqa shyqqannan keıin Almatyda Aqmolaǵa memlekettik organdardy qonystandyrý jumystary bastaldy .
1998 jyldyń 6 mamyrynda Qazaqstan Respýblıkasynyń Prezıdentiniń Qaýlysy boıynsha, Aqmola ataýy Astana bolyp ózgerdi. Astana qalasynyń qazaq eliniń jańa astanasy retinde halyqaralyq tanystyrylymy 1998 jyly 10 maýsymynda ótti.
Astana kúni 6 shilde kúni atalyp ótiledi. Óıtkeni dál osy kúni Qazaqstan Respýblıkasynyń Joǵary Keńesi astanany Almatydan Aqmola aýystyrý týraly sheshim qabyldaǵan bolatyn. Bul kún memlekettik mereke bolyp sanalady. 1999 jyly ıÝNESKO-nyń sheshimi boıynsha Astana qalasyna «Beıbitshilik qalasy» joǵary ataǵy berilip, medalmen marapattaldy. Bul ataq qysqa merzim ishinde áleýmettik-ekonomıkalyq, saıası jáne mádenı damýda neǵurlym áserli ári qýatty ósýge, turaqty etnıkaaralyq qatynasty ornyqtyrýǵa qol jetkize alǵan ǵalamshardyń jas qalalaryna beriledi. Brazılııada ótkizilgen bul konkýrsta Astana barlyq ólshemder boıynsha álemniń ár túrli elderiniń on eki qalasyn basyp ozdy.
1998 jyly Astana erkin ekonomıkalyq aımaqtyń WEPSA halyqaralyq qaýymdastyǵyna kirdi. Álemniń 15 qalasy Qazaqstan elordasynyń baýyrlas qalalary bolyp tabylady, olardyń arasynda Máskeý, Berlın, Varshava, Mınsk, Kıev, Ankara, Bangkok jáne basqalary bar.
Búginde Astana túrli halyqaralyq deńgeıdegi sharalarly ótkizetin ortalyqqa aınalyp úlgerdi. Máselen, 2010 jyly elordada 11 jyldyq toqyraýdan keıin EQYU sammıti uıymdastyrylyp, óte joǵary deńgeıde ótkizildi. Sonymen qatar ótken jyly 7-shi qysqy Azıada oıyndary da joǵary talapqa saı uıymdastyryldy. Álemdik jáne dástúrli dinder kóshbasshylarynyń sezi de turaqty ótkizilip keledi. Astana aldaǵy ýaqytta da osyndaı joǵary deńgeıdegi sharalardy ótkizý ornyna aınalady. Budan bólek, Astana 2017 jyly EXPO-2017 Halyqaralyq mamandandyrylǵan kórmeni joǵary deńgeıde ótkizýge baryn salatyn bolady.
