Búgin Djekı Chan 56 jasqa toldy
ASTANA. Sáýirdiń 7-si. QazAqparat - Sáýirdiń 7-si kúni tanymal akter jáne kaskader Djekı Chan 56 jasqa toldy. Ártis, kaskader, kınorejısser, prodıýser, stsenarıst, ánshi Djekı Chan 1954 jyly 7 sáýirde Gonkong qalasynda kedeı otbasynda dúnıege kelgen.
Onyń shyn esimi Kong-Sang Chan, Gonkongtan shyqqan degen maǵynany bildiredi. Ata-anasy taqyr kedeı bolǵandyqtan, bolashaq ártis bala kúninde ashtyqty talaı bastan keshken. Keıin ata-anasyna jumys tabylyp, Avstralııaǵa qonys aýdarǵanda, 6 jasar Djekı otanynda qalyp, Qytaı jabyq dramalyq akademııasyna oqýǵa qabyldanady. Ol kezde akademııa oqýshylardyń ata-anasymen shart jasasyp, eger bala áldeqalaı jaraqat alyp nemese qaıtys bolyp ketken jaǵdaıda oqý orny jaýap bermeıtinin málimdeıdi eken. Sóıtip, taǵdyr tálkegine qalǵan ol akademııadaǵy naǵyz qatań tártiptiń tezine túsip, tańǵy 5-ten turyp, 16-17 saǵat boıyna sozylatyn tynymsyz jattyǵýlardyń shyńdalýynan ótedi.
1971 jyly akademııany bitirip, kınodaǵy jolyn kaskaderlikten bastaǵan qaıtpas qaısar Djekı Chan akterlik ómirde de nebir asa qaýipti trıýkterdi ózi oryndap, basyn talaı qaterge tikken. Eki omyrtqasyn, murnyn, aıaǵy men qolyn da talaı syndyryp, keńirdegin jaralap, kózinen de aıyrylyp qala jazdaǵan. Tipti bas súıegin de syndyryp, ólimnen qalǵanyn jurt bile bermeıdi.
Sonymen qatar Djekı Chan ánshi, kóptegen kınolaryndaǵy ánderdi ózi oryndaǵan, 80 jyldardan bastap qazirgi kúnge deıin 20 albomdy ánder jınaǵyn shyǵarǵan. Biraq, qalyń jurt Djekı Chandy ánshi retinde emes, ártis retinde tanıdy. 100-den astam fılmderde basty rólderdi somdaǵan. Eń alǵashqy túsken kınosy «Máńgilik mahabbat», «Jas jolbarys». Osy akterlik ónerdiń, eren eńbektiń arqasynda Djekı Chan álemdegi eń baı adam atanyp jáne kóptegen tabystarǵa qol jetkizip otyr.
