Búgin Dúnıejúzilik kóz janarynyń kúni
ASTANA. 11 qazan. QazAqparat - Dúnıejúzilik kóz janarynyń kúni Dúnıejúzilik densaýlyq saqtaý uıymynyń (DDSU) bastamasymen qazan aıynyń ekinshi beısenbisinde atap ótiledi.
Bul data kúntizbede zaǵıptyq, kóz kórýiniń nasharlaýy jáne kóz kórýi nasharlaǵan adamdardy saýyqtyrý problemalaryna jahandyq nazar aýdartý maqsatynda belgilendi.
Bul kún sondaı-aq, DDSU men Zaǵıptyqtyń aldy alý jónindegi halyqaralyq agenttik qurǵan «Kóz janary 2020: kórýge quqyq» atty zaǵıptyqtyń aldyn alý boıynsha jahandyq bastamanyń negizgi oqıǵasy bolyp tabylady.
Zaǵıptyqtyń aldy alý jónindegi halyqaralyq agenttiktiń málimetinshe, álemde 284 mıllıonǵa jýyq adamda kóz janarymen baılanysty problemalar bar, olardyń 39-y mıllıony múldem kórmeıdi. Kóz syrqattaryna 19 mıllıonnan astam bala shaldyqqan. Ýaqytyly em-dom qabyldaǵan jaǵdaıda zaǵıptyqtyń 80 paıyz oqıǵasynyń aldyn alý múmkin edi.
Dúnıejúzilik kóz janarynyń kúni sheńberinde kóz aýrýlaryn boldyrmaýǵa baǵyttalǵan aǵartýshylyq jáne aldyn alý is-sharalary ótkiziledi. Keıbir elderde bul kúni turǵyndar oftalmologtyń qaraýynan ótýge múmkindik alady.
