Búgin - Dúnıejúzilik elektr baılanysy jáne aqparattyq qoǵam kúni

Dúnıejúzilik elektr baılanysy jáne aqparattyq qoǵam kúni buryn atalyp ótip kelgen Halyqaralyq telekommýnıkatsııalar kúnin jáne «Dúnıejúzilik aqparattyq qoǵam kúnin» aýystyryp otyr. 2006-shy jylǵy qarashada Halyqaralyq Elektr baılanysy odaǵynyń (HEO) Antalııadaǵy (Túrkııa) Ýákiletti konferentsııasynda bul eki ataýly kún 17-shi mamyrda Dúnıejúzilik elektr baılanysy jáne aqparattyq qoǵam kúni retinde atalyp ótiledi degen sheshim qabyldandy.

Bul kún - barlyq programmısterdiń, júıelik ákimshilerdiń, ınternet-provaıderlerdiń, veb-dızaınerlerdiń, ınternet-basylymdar redaktorlarynyń basqa da aqparattyq tehnologııalar salasynda jumys isteıtin adamdardyń kásibı meıramy.

Informatıka órkenıettiń beınesin túbirimen ózgertip otyr. Ol álemdik ekonomıkada, óndiriletin ónimniń sany men sapasyn kúrt kóterip, naǵyz jarylys týǵyzdy. Degenmen, ınformatıkanyń mańyzy áldeqaıda keńirek. Bul adamzatqa buryn bolyp kórmegen múmkindikter jasap otyr: bilim basty baılyqqa aınaldy, óz betinshe bilim alýdyń keremet múmkindikteri ashyldy.