Búgin - Dúnıejúzilik búırek kúni
ASTANA. 14 naýryz. QazAqparat - Jyl saıyn álemniń 154 elinde naýryz aıynyń ekinshi beısenbisinde Dúnıejúzilik búırek kúni atap ótiledi.
Dúnıejúzilik búırek kúni úkimettiń, medıtsınalyq qaýymdastyqtyń jáne qoǵamnyń nazaryn búırektiń sozylmaly syrqatynyń artý problemasyna aýdartý, búırek syrqattary, onyń aldyn alý jáne emdeýge qatysty aqparattardy taratýdy jaqsartý maqsatyn tutady.
Nefrolog dárigerler búırek aýrýlaryna shaldyǵý qaýpin azaıtýǵa septigin tıgizetin 8 erejeni ustanýǵa usynady:
1. Dene shynyqtyrýmen aınalysyńyz. Dene shynyqtyrý búırek aýrýlarynyń qaýpin azaıtady.
2. Qandaǵy qanttyń deńgeıin baqylap otyryńyz. Qant dıabetimen aýyratyn adamdardyń teń jartysynda búırektiń sozylmaly aýrýy paıda bolady, sondyqtan mundaı naýqastarǵa jylyna bir ret búırekti teksertý qajet.
3. Qan qysymyn baqylap otyryńyz. Gıpertenzııa búırekti zaqymdaıtyn sebepterdiń biri.
4. Dene salmaǵyn baqylańyz. Tuzdy paıdalaný mólsherin kúnine 5-6 grammǵa deıin azaıtyńyz (bir as qasyq shamasynda).
5. Kúninen 1-1,5 lıtrdan az emes mólsherde sý ishińiz. Sýdy shyryndarmen nemese gazdy sýsyndarmen almastyrmańyz.
6. Shylym shekpeńiz. Temeki búırektegi qan aınalymyn buzady jáne búırektiń qaterli isikke shaldyǵý qaýpin arttyrady.
7. Dári-dármekterdi dárigerdiń nusqaýynsyz qabyldamańyz.
8. Eger sizde - qant dıabeti, gıpertenzııa, artyq salmaq bolsa nemese otbasy múshelerińizdiń bireýi búırek syrqatymen aýyratyn bolsa, onda búırekti turaqty túrde teksertip turyńyz.
