Búgin - Dúnıejúzilik bezgekke qarsy kúres kúni
ASTANA. 25 sáýir. QazAqparat - Dúnıejúzilik bezgekke qarsy kúres kúni 2007 jyly Dúnıejúzilik densaýlyq saqtaý uıymynyń 60-ynshy sessııasynda bekitildi jáne jyl saıyn 25 sáýir kúni atap ótiledi.
Bul kún bezgekke qarsy tıimdi kúresti qamtamasyz etý boıynsha jahandyq kúsh-jigerlerdi nasıhattaýǵa arnalǵan.
Bezgek - adamǵa masalar túrleriniń biri shaqqan kezde beriletin ınfektsııalyq aýrýlar toby. Naýqasta ádette qaltyraý, tońazý, baýyr men kókbaýyr kóleminiń ulǵaıýy bolady. Jyl saıyn 350-den 500 mıllıonǵa deıin adam bezgekke shaldyǵady, olardyń bir mıllıonnan úsh mıllıonǵa deıini qaıtys bolady. Syrqattaný oqıǵalarynyń 90 paıyzǵa jýyǵy Afrıka, Taıaý Shyǵys, tipti Eýropanyń keıbir óńirlerine tıesili. Erekshe qaýipti topqa bes jasqa deıingi balalar jatady.
