Búgin — dúnıejúzilik arterııalyq gıpertonııamen kúres kúni

ALMATY. QazAqparat - Kardıologııa jáne ishki aýrýlar ǵylymı-zertteý ınstıtýtynyń kardıolog dárigeri, medıtsına ǵylymdarynyń kandıdaty Gúlnar Úderbaeva gıpertonııanyń aldyn alý jáne emdeý týraly atty, dep habarlaıdy QazAqparat tilshisi.

Arterııalyq gıpertonııa – júrek-qantamyr júıesiniń eń keń taralǵan aýrýy. Onyń negizgi belgisi - arterııalyq qan qysymynyń joǵary bolýy.

Dárigeri Gúlnar Úderbaevanyń aıtýynsha, arterııalyq qan qysymynyń joǵary bolýy ólim men múgedektikke alyp keletin ınfarkt pen ınsýlttiń damý qaýpiniń jetekshi faktory.

«Arterııalyq gıpertonııa kezinde arterııalyq qan qysymynyń kóterilýine sezimtal aǵzalar zaqymdanady, bul mı qanaınalymynyń ózgerýi. Joǵary arterııalyq qan qysymynyń turaqty belgileri: júrektiń sol jaq qarynshasynyń gıpertrofııasy, júrektiń ıshemııalyq aýrýy, júrek jetkiliksizdigi, yrǵaqtyń túrli buzylystary, ateroskleroz, búırek pen kózdiń zaqymdanýy. Arterııalyq gıpertonııa qaýpiniń faktorlaryna tuqym qýalaýshylyq, artyq salmaq, alkogol men taǵamda tuzdyń kóp mólsherin tutyný jatady»,- deıdi spıker.

Sonymen qatar, ol emdeý joldaryn da aıtyp berdi.

«Arterııalyq gıpertonııasy bar naýqastardy emdeý kezinde júrek-qantamyr asqynýlarynyń damý qaýpi men olardan bolatyn ólim-jitimdi azaıtý qajet. Bul ómir boıy uzaq emdelý arqyly iske asyrylady. Dári-dármekpen emdeý mı, júrek, búırekti qorǵaý úshin de baǵyttalǵan», - deıdi Gúlnar Úderbaeva.

Dárigerdiń keltirgen deregine sáıkes, búgingi kúni elde arterııalyq gıpertenzııamen dıspanserlik esepte 1 530 335 patsıent tur.