Búgin dúnıejúzilik alǵashqy medıtsınalyq kómek kórsetý kúni
Alǵashqy kómek – adam ómirin qutqarýǵa baǵyttalǵan shuǵyl shara. Alǵashqy kómek kórsete bilý – qarapaıym, biraq óte mańyzdy daǵdy. Bul daǵdynyń arqasynda adam ómirin saqtap qalýǵa bolady.
QR Prezıdenti Іs basqarmasy Medıtsınalyq ortalyǵy aýrýhanasynyń baspasóz qyzmeti taratqan málimetke sáıkes, atalǵan mekeme tıisti úlgidegi sertıfıkat bere otyryp, halyqaralyq standarttar boıynsha – BLS (kezek kúttirmeıtin kómek kórsetý daǵdylary), ACLS (júrek-ókpe reanımatsııasynyń keńeıtilgen kýrsy), PALS (pedıatrııadaǵy ókpe reanımatsııasy), PHTLS (travma kezinde gospıtalızatsııaǵa deıin kómek kórsetý júıesi) kýrstaryn ótkizedi.
Amerıkalyq júrek qaýymdastyǵy (AHA) akkredıtteýinen ótken aýrýhananyń tájirıbeli nusqaýshylary maneken-trenajerlarmen oqytylady.
Olardyń ishinde BLS kýrsy – qazir álemdegi eń tanymal alǵashqy kómek kýrsy. Alǵashqy kómek kórsetýdi úırenip, adam ómirin qutqaryp qalǵysy keletinderdiń barlyǵy osy kýrsta oqýdan óte alady.
Halyqaralyq standarttarǵa sáıkes aýrýhana qyzmetkerleri eki jylda bir ret Basic Life Support (BLS) – alǵashqy kómek kórsetý jáne bazalyq reanımatsııa daǵdylaryna oqytýdan ótedi. Halyqaralyq standarttar boıynsha oqyǵan personal oqys oqıǵanyń alǵashqy mınýttarynan bastap alǵashqy kómek kórsete alady: zardap shekken adamnyń jaǵdaıyn anyqtaý, jedel járdemdi durys shaqyrýdy uıymdastyrý, reanımatsııalyq kómek kórsetý, avtomatty syrtqy defıbrıllıatordy paıdalaný, bir búıirine qaýipsiz jatqyzý, tynys alý joldarynyń obstrýktsııasy kezinde kómek kórsetý.
QR PІB Medıtsınalyq ortalyǵy aýrýhanasynyń Oqý-klınıkalyq ortalyǵy 2016 jyldan bastap jumys isteıdi. Osy kezeńde munda 9000-ǵa jýyq adam oqydy. Osy jyldyń 8 aıynda medıtsına qyzmetkerleri, kúzet qyzmetiniń mamandary, júrgizýshiler, QT jáne TJ jáne basqa mamandar qatarynan 600-den astam adam oqytyldy. Sondaı-aq, aýrýhananyń barlyq bloktarynda medıtsınalyq kómek kórsetýge arnalǵan defıbrıllıatorlar ornatyldy.