Búgin - Dúnıejúzilik áleýmettik ádilettilik kúni
ASTANA. 20 aqpan. QazAqparat - Dúnıejúzilik áleýmettik ádilettilik kúni álemde 2009 jyldan bastap atap ótilip keledi.
BUU Bas Assambleıasy merekeni 2007 jyldyń 26 qarashasynda bekitti. Jańa data - 20 aqpannyń paıda bolýyna 1995 jyldyń naýryzynda Kopengagende joǵary deńgeıde ótken búkilálemdik kezdesý túrtki boldy. Onda qazirgi qoǵamdy áleýmettik damytý mindetteri jarııa etildi.
BUU-ǵa múshe-memleketter 20 aqpandy ulttyq deńgeıde áleýmettik ádilettilikti nyǵaıtýǵa baǵyttalǵan is-sharalardy ótkizýge arnaıdy. Bul baǵytta jumys isteıtin negizgi qujattardyń biri - ádiletti jahandaný maqsatynda áleýmettik ádilettilik týraly deklaratsııa.
BUU kedeıshilikti joıý, eńbekpen tolyq qamtamasyz etý, laıyqty jumys taýyp berý, erler men áıelder teńdigin saqtaý, barlyq adamdar úshin áleýmettik jaıly jaǵdaı men ádilettilikti iske asyrý prıntsıpterin qoldaıdy.
