Búgin Dúnıejúzi qazaqtary qaýymdastyǵynyń tóraǵasy Talǵat Mamashev «Eýrazııalyq birlik úshin» qorynyń prezıdenti Dr.Ishtvan Ventsemen kezdesti
ALMATY. 14 qarasha. QazAqparat /Názıra Eleýhan/ - Búgin Almatyda Qaýymdastyq úıinde Dúnıejúzi qazaqtary qaýymdastyǵynyń tóraǵasy Talǵat Mamashev pen Majarstandaǵy qypshaqtar qoǵamynyń múshesi, ári «Eýrazııalyq birlik úshin» qorynyń prezıdenti Dr.Ishtvan Ventse men qordyń tóralqa múshesi Pap Atılla qatysqan kezdesý ótti.
Kezdesýde Dr.Ishtvan Ventse, 2009 jylǵy «Altyn adamnan Atıllaǵa deıin» atty tarıhı shabandozdar saıahatyna qaýymdastyq tarapynan kórsetilgen qamqorlyqtary úshin Talǵat Asylulyna úlken alǵysyn bildire otyryp, 2012 jyly «Býdapesht-Astana» baǵyty boıynsha joǵarydaǵy is-sharany jalǵastyrýdy, Elbasynyń týǵan kúni atajurtqa jetýdi josparlap otyrǵanyn aıtty. Sondaı-aq, ol óz sózinde: «Rýmynııa elindegi Dobrýj tatarlaryn (noǵaılaryn) izdeýshi retinde alǵashqylardyń biri bolyp otyrsyz. Biz Dobrýj qalasyn basyp ótip, ondaǵy qandastarymyzben kezdesken ýaqytta árdaıym sizdiń sálemińizdi jetkizetin bolamyz, olarmen baılanys jasaýlaryńyzǵa ýáde beremin», - dep rızashylyǵyn bildirdi.
Óz kezeginde Talǵat Mamashev: «Sizderdiń jobalaryńyzdy qoldaýǵa daıynbyz, marshrýttaryńyzdy aldyn ala, erterek bergenderińiz jón jáne de Rýmynııada júrgen qandastarymyzben baılanys jasaǵymyz keledi. Norvegııanyń Oslo qalasyndaǵy noǵaılarmen kezdesý ótkizgenimizde qoǵam quryp bizge tirkelińizder degen pikir bildirgen edim. Olar áli jaıbaraqattyq tanytyp júr»,-dedi.
