Búgin – Dıplomatııalyq qyzmet kúni
1992 jyly 2 shildede Táýelsiz Qazaqstannyń Syrtqy ister mınıstrligi qurylǵan edi. Dál osy kúni Prezıdenttiń «QR Syrtqy ister mınıstrligi týraly», «Qazaqstan Respýblıkasynyń elshiligi týraly» jáne «QR Tótenshe jáne Ókiletti elshisiniń negizgi mindetteri men quqyqtary týraly» erejelerdi bekitý týraly Jarlyǵy shyqty.
«QR Prezıdentiniń 1998 jylǵy 20 qańtardaǵy «Qazaqstan Respýblıkasyndaǵy kásibı jáne ózge de merekeler týraly» №3827 Jarlyǵyna tolyqtyrýlar engizý týraly» QR Prezıdentiniń 2009 jylǵy 1 shildedegi № 837 Jarlyǵynda kásibı jáne ózge de merekeler tizbesine 2 shilde – Dıplomatııalyq qyzmet kúni dep tolyqtyryldy.
Byltyr Memleket basshysy Qasym-Jomart Toqaev dıpkorpýs ókilderin elimizdiń dıplomatııalyq qyzmetiniń 30 jyldyǵymen quttyqtap, bul mereıtoıdyń Jańa Qazaqstan qurýǵa kirisken syndarly sátpen tuspa-tus kelgenin aıtqan edi.
«Biz óńirlik jáne jahandyq protsesterge belsendi qatysatyn ornyqty ári bedeldi memleketke aınaldyq. Sizder táýelsizdigimizdiń alǵashqy kúninen elimizdiń múddesin halyqaralyq arenada qorǵap kelesizder. Qazirgi geosaıası turaqsyzdyq jaǵdaıynda sizder jahandyq álemde Qazaqstannyń ustanymyn nyǵaıtýǵa jáne shet memlekettermen yntymaqtastyqty damytýǵa úlken úles qosasyzdar», - dedi Qasym-Jomart Toqaev.
Jaqynda Memleket basshysy Aqordada Germanııa Prezıdenti Frank-Valter Shtaınmaıermen kelissózderden keıin Qazaqstan daýlardy dıplomatııalyq jolmen sheshý isine belsene atsalysýǵa daıyn ekenin aıtty.
«Kelesi másele - halyqaralyq kúntártibi. Álemdegi túrli saıası, ekonomıkalyq shıelenister elimizdi alańdatyp otyr. Árıne, barlyq túıtkil halyqtardyń, bolashaq urpaqtyń ıgiligi úshin beıbit jolmen sheshilýge tıis. Ózderińizge málim, buǵan deıin Qazaqstan daýlasqan taraptardy bitimge shaqyrdy. Olarǵa kelissóz júrgizý úshin beıtarap alań usyndy. Elimiz daýlardy dıplomatııalyq jolmen sheshý isine belsene atsalysýǵa daıyn», - dedi Qasym-Jomart Toqaev.
