Búgin Dımashtyń týǵan kúni: Nıý-Iorkte ánshiniń fotolary alyp ekrannan kórsetilýde
Búgin AQSh-tyń Nıý-Iork qalasyndaǵy Taıms-skver alańynda úlken ekrannan D.Qudaıbergenniń fotolary kórsetildi.
«Sálem, Taıms-skver! Sálem,álem! Sálem, 29 jas! Barlyqtaryńyzǵa osynshama úlken qurmetterińizge kóp rahmet», - dep jazdy ánshi Instagram-daǵy paraqshasynda.
Taıms-skverde túsirilgen vıdeodan Dımashtyń esimin atap aıǵaılaǵan jankúıerlerdiń daýysyn estýge bolady.
Buǵan deıin Dımash óziniń týǵan kúninde jańa ániniń beınebaıanyn jarııalaıtynyn aıtqan bolatyn.
Dımash (Dinmuhammed) Qanatuly Qudaıbergen – ánshi, kompozıtor, mýltıınstrýmentalıst. Ol 1994 jyly Aqtóbe qalasynda dúnıege kelgen. Ata-anasy – tanymal ánshiler Qanat jáne Svetlana Aıtbaevtar.Dımash alǵash ret spektaklde oınap, kópshilikke tanyla bastady. Bes jasynda tuńǵysh ret mýzykalyq kolledj sahnasynda án salǵan.
Alty jasynda «Aınalaıyn» respýblıkalyq baıqaýynyń «Fortepıano» nomınatsııasynda jeńimpaz atandy.
2010 jyly «Baıqonyrdyń ásem daýystary» halyqaralyq festıvaliniń І júlde laýreaty atandy.
2012 jyly «Jas qanat» respýblıkalyq jas án oryndaýshylar baıqaýynyń gran-prı júldesine ıe bolyp, osy jyly «Vostochnyı bazar» halyqaralyq baıqaýynda І júlde aldy.
2013 jyly Dımash Qudaıbergen «Meıkın Azııa» І halyqaralyq festıvaliniń jeńimpazy boldy. Sonymen qatar Vıtebsk qalasynda ótken «Slavıan bazary-2015» XXIV halyqaralyq estradalyq án oryndaýshylar baıqaýynda gran-prı ıelendi.
2015 jyly 28 qazan kúni Ystanbulda Dımash «Abu TV» halyqaralyq Azııa-Tynyq muhıt festıvalinde Qazaqstan Respýblıkasynyń atynan alǵash ret qatysty.
2014 jyly Ahmet Jubanov atyndaǵy mýzykalyq kolledjde akademııalyq án oryndaý synybyn támamdap, Qazaq ulttyq óner ýnıversıtetiniń «estrada óneri» fakýltetine tústi. Dımash qazaq, aǵylshyn, orys, qytaı, serb, ıtalıan, frantsýz, taǵy basqa tilderde án oryndaıdy. Qytaıdyń I am a singer (Men ánshimin) telebaıqaýyna qatysty. Saıystyń barlyq kezeńinen ótip ekinshi oryndy jeńip aldy. Atalǵan jobany Qytaıdyń eń iri Hunan TV telearnasy kórsetedi.
2017 jyly Azııanyń «Gremmıi» sanalatyn «Top Chinese Music Award» syılyǵyn «Azııanyń eń tanymal ánshisi» atalymynda jeńiske jetti. Kóptegen halyqaralyq júldelerdiń ıegeri.
