Búgin Dımash Qudaıbergenniń kontsertine baılanysty elordada joldar jabylady

NUR-SULTAN. QazAqparat - Búgin elordada Dımash Qudaıbergenniń jeke kontsertiniń ótýine baılanysty saǵat 19:00-den 00:00-ge deıin Qabanbaı batyr dańǵylynyń boıynda Kereı - Jánibek handar kóshesinen Uly Dala dańǵylyna deıingi aralyqta kólik qozǵalysy shekteledi, dep habarlaıdy QazAqparat.

Nur-Sultan qalalyq Polıtsııa departamentinen málim etkendeı, jol qozǵalysy qaýipsizdigin qamtamasyz etý kezinde qoǵamdyq kólikterge basymdyq beriledi.

Osyǵan baılanysty Polıtsııa departamenti júrgizýshilerge jeke kólikterinen bas tartyp, qoǵamdyq kóliktermen júrýge keńes beredi. Nur-Sultan halyqaralyq áýejaıy aýmaǵyna jáne jaqyn ornalasqan eldi mekenderge saparlaıtyn turǵyndarǵa aldyn ala basqa qosymsha baǵytty tańdaýdy usynady. Sondaı-aq, kórermender jeke kólikterin jaqyn ornalasqan «Barys - Arena» SK, «Alaý» SK, «Saryarqa Velotregi» SK aýmaǵyndaǵy kólik turaqtaryna qoıýlaryna bolady.

Budan bólek, kórermender úshin 19:00-22:00 aralyǵynda kontsert ótetin «Astana Arena» stadıonyna № 10; 12; 28; 37; 40; 51; 53; 60 qalalyq jáne qala mańyna qatynaıtyn arnaıy reıstik avtobýstar júredi.

Kontsertten shyqqan kórermender úılerine qaıtý úshin Qabanbaı batyr dańǵyly jaǵynan avtobýstarǵa otyra alady.

Osyǵan baılanysty, Nur-Sultan qalalyq polıtsııa departamenti elorda turǵyndary men qonaqtaryna óz baǵyttaryn aldyn ala josparlaýǵa keńes beredi.