Búgin Chernobyl atom elektr stantsııasynda jarylys bolǵan kún
NUR-SULTAN. QazAqparat - Osydan 34 jyl buryn, ıaǵnı 1986 jyldyń 26 sáýirinde álemdegi eń joıqyn tehnogendik apattardyń biri - Ýkraınadaǵy Chernobyl atom elektr stansasynda jarylys boldy, dep habarlaıdy QazAqparat tilshisi.
Chernobyl apatynyń saldarynan Ýkraınanyń eleýli bóligi men Reseıdiń Brıansk jáne Kalýga oblystarynyń aýmaǵynda radıoaktıvtik lastanýdan halyq ómirine zor qaýip tóndi. AES-ten radıýsy 30 shaqyrym jerde turatyn halyq basqa jerlerge kóshirildi. Radıoaktıvti tútin aımaqtan asyp, 10-nan asa memlekettiń 145 myń sharshy shaqyrym jerin lastady. Kem degende 5 mıllıon halyq zardap shekken. Onyń zardaby qanshalyqty uzaqqa baratyny áli belgisiz. 1986 jyldyń qarasha aıyna deıin Chernobyl AES-indegi apatty joıýǵa búkil Keńes odaǵynan 650 myńnan astam adam tartyldy. Olardyń arasynda 32 myńnan astam qazaqstandyqtar jumys istedi. Kópshiligi densaýlyqtarynan aıryldy jáne qurban boldy.
Sonymen qatar 2006 jyldyń 10 qarashasy kúni Ýkraına Prezıdentiniń Jarlyǵymen estelik datasy - Chernobyl AES apaty saldaryn joıýǵa qatysqandarǵa qurmet kórsetý kúni bekitildi. Sol data jyl saıyn 14 jeltoqsan kúni atalyp ótedi. 14 jeltoqsandy ózderiniń merekeleri sanaıtyn mamandar bul kúndi kópten beri «Lıkvıdator kúni» dep ataıdy. 1986 jyly apat saldaryn joıýǵa qatysýshylar bas qosyp, alǵashqy jeńisterin atap ótti. Sebebi, barlyq qıyndyqtarǵa qaramastan apat saldaryn joıýǵa qatysqandardyń ózderi 14 jeltoqsandy mereke dep sanaıdy.
Chernobyl apaty bolǵan kún Reseı de resmı mereke retinde bekitilgen. 2012 jyldyń sáýirinde RF Prezıdenti Dmıtrıı Medvedev Estelik datalar týraly federaldyq zańǵa ózgerister engizip, oǵan sáıkes, Reseıde jańa data - Radıatsııalyq avarııalar men apattardyń saldaryn joıýǵa qytysýshylar men osy avarııalar men apattardyń qurbandaryn eske alý kúni paıda boldy. Ol jyl saıyn 26 sáýir kúni atalyp ótedi.
