Búgin BUU Qaýipsizdik Keńesiniń turaqty emes músheleri saılanady

ASTANA. QazAqparat - Búgin Bas Assambleıada 2017-2018 jyldarǵa BUU Qaýipsizdik Keńesiniń bes turaqty emes múshesi saılanady. Azııa-Tynyq muhıty aımaǵynyń ókili retinde Qazaqstan bul oryn úshin alǵash ret kúreske túskeli otyr.

Batyseýropalyq jáne basqa da elder tobynan 2 orynǵa Italııa, Nıderlandy jáne Shvetsııa elderi talasady. Latynamerıkalyq memleketter tobynan 1 orynǵa jalǵyz úmitker bar - Bolıvııa. Afrıka elderi tobynda da talas bolmaıtyn bolyp tur. Munda 1 orynǵa jalǵyz úmitker bar. Ol - Efıopııa.

Al Azııa-Tynyq muhıty aımaǵy memleketterine keler bolsaq, munda 1 orynǵa 2 úmitker el bar: Qazaqstan jáne Taıland. Qazaqstan Respýblıkasy buǵan deıin BUU QK quramynda bolmaǵan. Al Taıland eli 1985-1986 jyldary Keńes quramynda bolǵan.

Ótken jyly BUU Qaýipsizdik Keńesiniń 2016-2017 jyldardaǵy turaqty emes músheligine Mysyr, Senegal, Ýkraına, Ýrýgvaı jáne Japonııa elderi saılanǵan bolatyn.

Osy jyldyń 31 jeltoqsanynan bastap Angola, Malaızııa, Venesýela, Jańa Zelandııa jáne Ispanııa memleketteri  Qaýipsizdik Keńestegi oryndaryn bosatady.

BUU Qaýipsizdik Keńesine 15 memleket múshelik etedi. Ulybrıtanııa, Qytaı Halyq Respýblıkasy, Frantsııa, Reseı Federatsııasy jáne Amerıka Qurama Shtattary - Keńestiń turaqty músheleri. Odan bólek 10 turaqty emes múshe memleketti Bas Assambleıa eki jylǵa saılaıdy. Ár jyl saıyn onyń beseýi jańaryp otyrady.