Búgin Búkilálemdik qol jýý kúni
ASTANA. 15 qazan. QazAqparat - Jyl saıyn 15 qazan kúni Búkilálemdik qol jýý kúni atap ótiledi.
Mundaı kúndi ótkizý bastamasy Dúnıejúzilik densaýlyq saqtaý uıymyna jáne BUU Balalar qoryna (ıÝNISEF) tıesili. BUU-nyń eki uıymy qalyptasyp ketken qarapaıym qol jýý úrdisi balalardy birqatar ınfektsııalyq aýrýlardan qorǵap qana qoımaı, kóptegen ómirlerdi saqtap qalatyndyǵyn aıtýdan jalyqpaı keledi.
«ıÝNISEF-tiń málimetinshe, jyl saıyn dıareıa (ish ótý) bir mıllıon júz myń balanyń ómirin qııady, al pnevmonııa (ókpeniń irińdi qabynýy) bir mıllıon eki júz ómirdi jalmaıdy. Qoldy sabyndap jýý balalar dıareıasyn eki esege, respıratorly aýrýlardyń sanyn tórt esege azaıtar edi», - deıdi ıÝNISEF-tiń baspasóz hatshysy Marksı Merkado.
Mereke jyl saıyn álemniń 80 elinde atap ótiledi. 2010 jyly Búkilálemdik qol jýý kúnine arnalǵan is-sharalarǵa álemniń 70-ten astam elinen 200 mıllıon adam jáne 700 myń mektep qatysty. Atalmysh kúndi uıymdastyrýshylar qatysýshylardyń sanyn jyl saıyn arttyryp otyrýǵa nıetti.
2010 jyly Bangladeshte 53 myń adam bir mezgilde qol jýyp, rekord ornatty.
