Búgin - Búkilálemdik azamattyq qorǵanys kúni
ASTANA. QazAqparat - Halyqaralyq azamattyq qorǵanys uıymy (HAQU) Bas assambleıasynyń buryshtamasyna sáıkes jyl saıyn 1 naýryz Búkilálemdik azamattyq qorǵanys kúni bolyp atalyp ótiledi, dep habarlaıdy QR ІІM Tótenshe jaǵdaılar komıtetiniń baspasóz qyzmetinen.
Bul kúnniń tarıhy 1931 jyly Jeneva aımaǵy qaýymdastyǵy dep atalatyn, ıaǵnı álemniń barlyq elderinde jergilikti aımaq qaýipsizdigin qurý týraly halyqaralyq kelisimderge qol qoıýmen bastaldy.
Jyl saıyn Búkilálemdik azamattyq qorǵanys kúni naqty uranmen atalyp ótiledi. Onyń bıylǵy jylǵy tańdalǵan taqyryby: «Turaqty damý turǵysynan azamattyq qorǵanys jáne zilzalalar qaterin azaıtý». Tabıǵı jáne tehnogendik sıpattaǵy tótenshe jaǵdaılardan turǵyndardy qorǵaý jáne áreket etýge daıyndyǵy - kásiporyndar jáne sharýashylyq nysandarynda qurylǵan azamattyq qorǵanys qurylymdarynyń, aýmaqtyq TJ organdarynyń negizgi mindeti bolyp tabylady.
1997 jylǵy qazan aıynda QR Prezıdenti N.Á.Nazarbaevtyń Qaýlysymen «Qazaqstan Respýblıkasy Halyqaralyq azamattyq qorǵanys uıymy Jarlyǵyna birigý týraly» zańy qoldanysqa engizildi. Bizdiń elimiz qyzmetiniń negizgi baǵyty memleketterdegi tabıǵı jáne tehnogendik sıpattaǵy tótenshe jaǵdaılardyń saldaryn joıý jáne aldyn alý salasyndaǵy úkimettik organdardyń úılestirilýin kúsheıtý bolyp tabylatyn halyqaralyq uıymnyń bedeldi tolyq quqyly múshesine aınaldy.
Búkilálemdik azamattyq qorǵanys kúni tabıǵı jáne tehnogendik sıpattaǵy tótenshe jaǵdaılardyń aldyn alý áreketinde memlekettiń koordınatsııasyna, oǵan turǵyndardy daıyndaýǵa, múmkin bolatyn shuǵyl jaǵdaılarǵa ulttyq tótenshe jaǵdaılar qyzmetterin úılestirýge baǵyttalǵan mańyzdy halyqaralyq aktsııa bolyp tabylady.
