Búgin Bolgarııadaǵy týrnırde Qazaqstan boksshylary alǵashqy jekpe-jekterin ótkizedi
Atalmysh týrnır 14 aqpan kúni bastaldy. Oǵan álemniń 40-tan astam memleketinen bylǵary qolǵap sheberleri keldi. Jigitter -10, qyzdar 8 salmaq dárejesi boıynsha baq synaıdy.
Qazaqstan boks federatsııasy málimetine súıensek, bul týrnırge bizdiń qurama sapynda Temirtas Júsipov (49 keli), Ánýar Muzapparov (52 keli), Qaırat Erálıev (56 keli), Zakır Safıýllın (60 keli), Sanatáli Tóltaev (64 keli), Abylaıhan Júsipov (69 keli), Erik Áljanov (75 keli), Bek Nurmaǵanbet (81 keli), Vasılıı Levıt (91 keli) jáne Qamshybek Qońqabaev (91 keliden joǵary) qatysady. Boksshy Ábilhan Amanquldyń jaraqat alyp qalýyna baılanysty ony 75 keli salmaqta áriptesi Erik Áljanov almastyryp otyr.
Atalmysh týrnırge bizdiń boksshylar budan buryn da qatysqan. Byltyr qazaqstandyq bylǵary qolǵap sheberleri 1 altyn, 4 qola medal alyp qaıtqan edi.
Búgingi jekpe-jekte bizdiń jigitter óz qarsylastaryn anyqtady. Ánýar Muzapparov Abraham Peres (AQSh) jáne Gaýrav Solankı (Úndistan) jubynyń jeńimpazymen kezdesse, Qaırat Erálıev bolgarııalyq Boıan Asenovpen qolǵap túıistiredi. Al Zakır Safıýllınniń qarsylasy ıtalııalyq Franchesko bolsa, Sanatáli Tóltaev Vensan Kırkorov (Bolgarııa) pen Maksımılıano Oddı (Italııa) jubynyń jeńimpazymen sharshy alańǵa shyǵady. Al Bek Nurmaǵanbet - Atıf Oberlton-kishi (AQSh), Vasılıı Levıt - Sanjar Tursynov (Ózbekstan) juptary arasynda báseke kórigi qyzbaq. Al aýyr salmaqtaǵy Qamshybek Qońqabaev túrik jigiti Mýsahıt Іlııastyń osal tusyn tabýǵa tyrysady.