Búgin «Bolashaq» baǵdarlamasy boıynsha konkýrsqa qujattar qabyldaý bastaldy
ASTANA. Maýsymnyń 7-si. QazAqparat /Qanat Mámetqazyuly/ - «Halyqaralyq baǵdarlamalar ortalyǵy» AQ 2010 jylǵy Qazaqstan Prezıdentiniń «Bolashaq» halyqaralyq stıpendııasyn taǵaıyndaý boıynsha konkýrsqa qatysýshylar úshin qajetti qujattardy qabyldaýdy bastady.
Búgin osy máselege arnalǵan baspasóz máslıhaty bolyp ótti, dep habarlaıdy QazAqparat.
«Bilim jáne ǵylym mınıstriniń buıryǵymen atalǵan konkýrsty ótkizý merzimi belgilendi. Bul rette qujattar akademııalyq oqý úshin 2010 jylǵy maýsymnyń 7-sinen shildeniń 30-yna deıin, al ǵylymı taǵylymdama úshin maýsymnyń 7-sinen qyrkúıektiń 30-na deıin qabyldanady. Qujattar Astana jáne Almaty qalalarynda qabyldanatyn bolady. Sonymen qatar, Ortalyqtyń Almaty qalasyndaǵy fılıaly maýsymnyń 7-si men shildeniń 15-i aralyǵynda tek qana óz betimen sheteldik oqý oryndaryna oqýǵa túskenderdiń qujattaryn qabyldaıdy», dedi baspasóz máslıhaty barysynda «Halyqaralyq baǵdarlamalar ortalyǵy» AQ prezıdenti Danııar Bekturǵanov. Onyń aıtýynsha, úmitkerlerge qoıylatyn talaptar burynǵysynsha, esh ózgerissiz qalǵan. «Bolashaq» stıpendııasyn taǵaıyndaý konkýrsyna tek JOO men mektep túlekteri ǵana emes, memlekettik qyzmetkerler de, ǵylymı-pedagogıka qyzmetkerleri men aýyl jastary da qatysa alady. Al osy atalǵan sanattaǵylar úshin «Bolashaq» baǵdarlamasy aıasynda birqatar jeńildikter qarastyrylyp, kvotalar da belgilengen.
«Bolashaq» baǵdarlamasy aıasynda basym baǵyttaǵy salalar tizbesine enetin mamandyqtar boıynsha bilim alý júzege asady. Bundaı tizimder jergilikti jáne atarýshy organdardyń, memlekettik uıymdardyń, JOO-lar men ǵylymı zertteý ınstıtýttarynyń tapsyrysy negizinde qalyptasady. Bıylǵy jyly basym mamandyqtar tizbesine akademııalyq oqý úshin 87 jáne ǵylymı taǵylymdama úshin 110 mamandyq engizilgen. Sońǵy jyldary baǵdarlama aıasynda tehnıkalyq, medıtsınalyq baǵyttarǵa kóbirek basymdyqtar qarastyrylǵan. Sonymen birge jyl saıyn «Bolashaq» baǵdarlamasy boıynsha usynylatyn sheteldik joǵary oqý oryndarynyń tizbesi qaıta qaralyp otyrady. Bıylǵy jyly usynylatyn oqý oryndarynyń tizimine akademııalyq oqý úshin 23 eldiń 200 oqý orny jáne ǵylymı taǵylymdamadan ótý úshin álemniń 24 eliniń 105 oqý orny, ǵylymı ortalyqtar men zerthanalar engizilgen», dedi D. Bekturǵanov. Onyń aıtýyna qaraǵanda, halyq arasynda «Bolashaq» stıpendııasyna taǵaıyndaýǵa qatysty qyzyǵýshylyq jyldan jylǵa artyp otyr. Sondyqtan da, aǵymdaǵy konkýrsqa qatysýshylar sany arta túsetini de boljanady. Máselen, byltyr «Bolashaq» baǵdarlamasy boıynsha konkýrsqa qatysý úshin 4 myń 75 adam qujat tapsyrsa, olardyń arasynda 1 myń 347-si stıpendııany ıelengen. Statıstıka boıynsha Astana, Almaty qalalary, Qaraǵandy jáne Ońtústik Qazaqstan oblystarynyń jastary baǵdarlamanyń belsendi qatysýshylary bolyp otyr.
Іrikteý erejesi, basym mamandyqtar men qajetti qujattar tizbesi, úmitkerlerdiń qosymsha saýalnamalary, sondaı-aq konkýrs boıynsha qosymsha aqparat «Halyqaralyq baǵdarlamalar ortalyǵy» AQ-nyń www. edu-cip.kz resmı saıtynda ornalastyrylǵan.
