Búgin bir top qostanaılyq marafonshy Astanadan Taraz qalasyna attandy
ASTANA. Qyrkúıektiń 20-sy. QazAqparat - Búgin bir top qostanaılyq marafonshy Astanadan Taraz qalasyna attandy. Olar keshe keshkisin Elordaǵa kelgen bolatyn. Qyrkúıektiń 17-si kúni Qostanaı qalasynan shyqqan marafonshylar bul saparlaryn Uly Jeńistiń 65 jyldyǵy men dańqty qolbasshy Baýyrjan Momyshulynyń 100 jyldyǵyna arnaǵan. Bul shara «Nur Otan» partııasynyń qoldaýymen júzege asyp otyr, dep habarlaıdy QazAqparat.
Marafonshylar quramynda 11 adam bar. Júgirýshiler tobyna Qostanaı memlekettik ýnıversıtetiniń professory, fılosofııa ǵylymdarynyń kandıdaty Qalqaman Jaqyp jáne sport ardageri Bekqul Sadyqov jetekshilik etedi.
Taraz jerine attanǵandardyń ishinde 74 jastaǵy Saǵyndyq Salmýrzın men 73 jasar Petr Sheketer bar. Olar buǵan deıin ár túrli deńgeıdegi 50 shaqty marafonǵa qatysqan. Sonymen qatar jarys jolyna názik jandylardyń arasynan Rımma Voevodınanyń jalǵyz ózi shyqqanyn aıta ketken jón. Rımma birneshe halyqaralyq marafondarǵa qatysqan sportshy.
Sondaı-aq júgirýshelerdiń qatarynda bokstan sport sheberi Muhtar Ahmetov pen tanymal sport jýrnalısi Sergeı Bırkle bar. Osy komanda quramynda marafonnan Qazaqstannyń jeńimpazy, ádilet podpolkovnıgi Qurmanaı Esirgepov jáne onyń shákitteri, QR Ádilet mınıstrligine qarasty Qostanaı qalasyndaǵy Qylmystyq-atqarý júıesi akademııasynyń kýrsanttary Jasulan Sádýaqasov pen Erlan Nuǵmanov ta júgirip bara jatyr.
Jol boıy kezdesken eldi mekenderde marafonshylar soǵysqa qatysqandarǵa ornatylǵan eskertkishterge gúl shoqtaryn qoıyp, turǵyndarmen júzdesip, salaýatty ómir saltyn nasıhattap keledi. Keńes odaǵynyń Batyry Baýyrjan Momyshulynyń Uly Otan soǵysynda dańqy jer jarǵan qolbasshy bolǵanyn, Máskeýdi qorǵaýdaǵy eren erligin aıtyp, jastardy patrıottyq tárbıege úndeıdi.
«Bizdi barlyq qalalar men aýyldardyń turǵyndary qoshemetpen qarsy alýda. Jergilikti basshylar men «Nur Otan» partııasynyń jetekshileri qurmet kórsetýde. Al jastar marafon týraly kóbirek bilgisi keledi jáne bizben birge biraz jerge deıin birge júgirip, shyǵaryp salady»,- deıdi marafonshy Qurmanaı Esirgepov.
Atalǵan marafondyq júgirý sapary qyrkúıektiń 24-i kúni Taraz qalasynda márege jetedi. Marafonshylar Baýyrjan Momyshulynyń týǵan jerinde bolady dep kútilýde. Al qyrkúıektiń 27-si kúni Qostanaıǵa oralady.
