Búgin bilim berý platformalarynda tehnıkalyq aqaýlar boldy – mınıstr
NUR-SULTAN. QazAqparat – 32 mıllıon sessııa bolǵannan keıin tehnıkalyq kemshilikter boldy. Bul týraly Ortalyq kommýnıkatsııalar ortalyǵynda «Tótenshe jaǵdaı kezinde qashyqtyqtan oqytýdyń jańa formattary» taqyrybynda ótken onlaın brıfıngte aıtyldy, dep habarlaıdy QazAqparat tilshisi.
«Ustazdar men oqýshylarǵa tanymal platformalardyń biri – Bilimland.kz. Osy platformada búgin 400 myńnan astam oqýshy jumys istedi. Bul platforma arqyly oqý jospary sheńberinde tıisti suraqtar beriledi jáne qatelermen jumys isteıdi. Odan keıin qaıtadan úsh deńgeıli tapsyrmalar beriledi. Kerek bolsa astynda forýmdar bolyp, muǵalimder ol jerde tapsyrmalaryn bere alady», - deıdi QR Bilim jáne ǵylym mınıstri Ashat Aımaǵambetov.
Ol platformalarda tehnıkalyq aqaýlar bolǵanyn da aıtty.
«Eki ret aqaý bolyp, eki ret te tıisti jumystardy júrgizdik. 32 mıllıon sessııa bolǵannan keıin máseleler týyndady, biraq ol máseleler sheshildi. Bul platforma kúni boıy da, qazir de jumys istep tur. Tehnıkalyq máseleler boıynsha áriptesterimizdiń jumysyn kórip otyrmyz. Bul baǵyttarda úlken aýqymdy, mańyzdy jumystar jasaldy. Sonyń nátıjesin búgin kórip otyrmyz. Tehnıkalyq aqaýlarǵa qaramastan oqýshylar atalǵan paltformalar boıynsha jumys isteýlerine múmkindik boldy. Kúni-túni jumys istegen áriptesterimizge Bilim jáne ǵylym mınıstriligi atynan úlken alǵysymdy aıtqym keledi», - deıdi ol.
