Búgin belgili sýretshi, etnograf-ǵalym Qalıolla Ahmetjannyń «Kóńil aınasy» atty kórmesi ashylady
ASTANA. Jeltoqsannyń 4-i. QazAqparat /Aıdyn Báımen/ - Búgin Astana qalasyndaǵy Qazirgi zaman óneri murajaıynda Qazaqstan Sýretshiler odaǵynyń múshesi, etnograf, tarıh ǵylymdarynyń kandıdaty, QR Mádenıet qaıratkeri Qalıolla Ahmetjannyń «Kóńil aınasy» atty kórmesi ashylady,
dep habarlaıdy QazAqparat.
Q.Ahmetjan Lenıngrad qalasyndaǵy I. Repın atyndaǵy KSRO Kórkemsýret akademııasynyń jıvopıs, músin jáne sáýlet ınstıtýtynan tálim alǵan. Ol ulttyq boıaýy mol, rýhanı tárbıege sýsyndaıtyn ondaǵan týyndylardyń avtory. Bir ereksheligi Qalıolla Ahmetjan halqymyzdyń qarý-jaraqtaryn zerttegen jan. 2006 jyly «Almatykitap» baspasynan «Qazaqtyń dástúrli qarý jaraǵynyń etnografııasy» atty zertteý eńbegi jaryq kórgen.
Belgili sýretshi osy kórmeni elimizdiń basty meıramy - Táýelsizdik kúnine oraı ótkizgeli otyrǵanyn málim etti. Atalmysh kórmede qyl qalam sheberiniń birneshe týyndylary jurtshylyq nazaryna usynylmaq. Onyń ishinde Qazaqstannyń ótkeni men búgini jáne keleshegi jaıly kórikti oılardy toǵystyrǵan shyǵarmalar bar.
Sýretshi, zertteýshi ǵalymnyń bul kórmesi 60 jyldyq mereıtoıy qurmetine arnalǵan. Qyl qalam sheberiniń qolynan shyqqan týyndylarynyń kórmesi saǵat 18.30-da ashylady.
