Búgin belgili ánshi Perızat Turarovanyń alǵashqy keshi ótedi
ASTANA. QazAqparat - Búgin Astana qalasynyń Kongress-Holl saraıynda belgili dástúrli ánshi Perızat Turarovanyń jeke kontserti ótedi. Bul - ánshiniń elordalyq ónersúıer qaýymǵa usynyp otyrǵan «Aıakóz arý» atty alǵashqy keshi.
Búgingi kontsertke Perızat Turarovanyń ustazy Ardaq Isataeva bastaǵan birqatar esimderi elge málim óner ıeleri qatysady. Sondaı-aq kesh qonaqtarynyń qatarynda Dosymjan Tańatarov, Erlan Rysqalı, Gúlzıra Bókeıhan, Nurǵalı Turlybekov syndy ánshiler, «Alaman» toby, «Saryarqa» ult aspaptar orkestri men «Shalqyma» halyq bı ansambli qatysady.
Perızat Turarova 1984 jyly 25 jeltoqsanda Shyǵys Qazaqstan oblysynyń Aıagóz qalasynda dúnıege kelgen. 2001 jyly orta mektepti bitirip, 2002-2008 jyldary Qurmanǵazy atyndaǵy Qazaq Ulttyq konservatorııasynda dáris alǵan. Qazirgi tańda Astana qalasynyń memlekettik fılarmonııasynda solıst.
Respýblıkalyq «Asyl mura» jáne D. Raqyshev atyndaǵy baıqaýlardyń laýreaty. Á. Qashaýbaev atyndaǵy respýblıkalyq baıqaýdyń Bas júldegeri. 2009 jyly Saýd Arabııasynyń Er-Rıad jáne Djıdda qalalarynda ótken Qazaqstannyń mádenıeti kúnderinde, 2010 jyly Shanhaı qalasynda ótken «Shanhaı Ekspo» dúnıejúzilik kórmesinde óner kórsetken.
