Búgin Belgııada jalpyulttyq ereýil ótedi
BRıÝSSELЬ. QazAqparat - Juma kúni Belgııanyń bútin aýmaǵynda el bıligindegi úkimettiń áleýmettik-ekonomıkalyq saıasatyna qarsy jalpyulttyq ereýil ótedi, dep habarlaıdy Brıýsseldegi QazAqparat tilshisi.
Ereýil uıymdastyrýshylary koroldiktiń iri kásipodaqtary - Hrıstıan kásipodaqtarynyń konfederatsııasy (CSC), Belgııanyń jalpyǵaortaq eńbek federatsııasy (FGTB) jáne Lıberaldy kásipodaq (CGSLB).
Buqaralyq sherýge baılanysty eldegi ákimshilik mekemelerdiń, mektepter men kóliktik qyzmetterdiń jumystary toqtaıtyndyǵy kútilýde. Sharaǵa sondaı-aq birqatar kommertsııalyq nysandar da qosylyp otyr.
Ereýilshiler 38 saǵattyq jumys aptasyn alyp tastaýdy kózdegen eńbek reformasyna sondaı-aq, úkimettiń bıýdjetti únemdeý saıasatyna jáne áleýmettik salanyń qysqartylýyna qarsy shyqpaq.
Aıta keteıik, úkimet basyna Sharl Mıshel kelgen eki jyldyń ishindegi bul besinshi jalpyulttyq bas kóterý.
