Búgin - Báısheshek kúni
ASTANA. 19 sáýir. QazAqparat - Jyl saıyn 19 sáýir kúni álemniń kóptegen elderinde dástúrge aınalǵan kóktem merekesi - Báısheshek kúni atap ótiledi.
Onyń tarıhy Anglııadan bastaý alady, mereke 1984 jyly bekitildi. Klımattyq erekshelikterge baılanysty báısheshekter qańtar aıynan bastap sáýirge deıin gúldeıdi. Máselen, Qazaqstanda olardy ádette aqpan aıynyń sońynda - naýryzdyń basynda kórýge bolady.
Atalmysh gúldi ártúrli memleketterde túrlishe ataıdy. Ony aǵylshyndar - qar tamshysy nemese qar syrǵasy, chehtar - qar búrshigi, nemister - qar qońyraýy, al biz báısheshek dep ataımyz. Ol qardyń astynan shyǵyp, kún nurynyń alǵashqy jylýynan gúldenetindikten, osyndaı ataýdy ıelengen kórinedi.
Ókinishke oraı, búginde báısheshek adam qolynan japa shegetin boldy. Julyp alynǵan gúlder birneshe kúnnen keıin solyp qalady. Báısheshekti jınaýǵa úıir adamdardyń kesirinen olardyń sany jyl sanap azaıyp keledi. Sondyqtan qazir báısheshekterdiń kóptegen túri joıylýdyń az-aq aldynda tur, olardy julýǵa tyıym salynǵan.
Biraq jylda kóktem shyǵysymen qalalarda báısheshekterdi saýdalaıtyndar qaıtadan shyǵady.
