Búgin «Balapan» balalar arnasynyń qurylǵanyna 4 jyl toldy (FOTO)
ASTANA. QazAqparat - Urpaǵymyzǵa sapaly, tárbıelik taǵylymy mol tele¬ónim¬der usynýdy basty maqsaty etken otandyq tuńǵysh «Balapan» balalar arnasyna 4 jyl toldy, dep habarlady «Qazaqstan» respýblıkalyq teleradıokrporatsııasynyń baspasóz qyzmetinen.
Telearna Elbasymyz Nursultan Ábishuly Nazarbaevtyń qoldaýymen quryldy. Arna qazaq tilinde habar taratady.
«Balapan» telearnasy alǵashynda 12 saǵat habar taratsa, búginde 17 saǵat boıy efırge shyǵady. Arnanyń týǵan kúnine oraı kishkentaı kórermender arasynda «Týǵan kúnińmen, Balapan» aktsııasy jarııalandy. Oǵan qatysýshylar redaktsııaǵa óleńder, ánder men quttyqtaýlaryn jiberdi. Al beınetaspaǵa jazylǵan quttyqtaýlar 27 qyrkúıekte telearnadan kórsetiletin bolady. «Kazmedıa ortalyǵynyń» úlken zalynda saǵat 11.00-den 16.00-ge deıin merekelik shara men kórme uıymdastyrylyp ótkiziledi. Onyń barlyǵy «Balapan» arnasynan tikeleı efırde kórsetiledi.
Sońǵy kezderi qazaq tilin jan-jaqty damytý men nasıhattaýǵa kóp jumys jasaldy. 2012 jyldyń 1 qazanynan bastap, «Balapan» HD-formatta habar tarata bastady. Bul súıikti baǵdarlamalardyń sapasyn arttyrýǵa yqpal jasady. Búgingi tańda telearna el turǵyndarynyń besten bir bóligin qamtıdy. Sheteldik kontenttiń sanyn azaıtýdyń arqasynda menshikti quramdy ulǵaıtý múmkin bolyp otyr. Búgingi tańda menshikti óndiris sany 30 paıyzdan 52-ge deıin kóbeıse, jyl sońyna deıin ol kórsetkish 64-ke deıin jetedi dep josparlanyp otyr. «Balapannyń» ǵalamtorda da birshama ilgerileýi baıqalady. Janrlyq baǵytty anyqtaý maqsatynda jylyna eki ret respýblıkamyzdyń kishkentaı kórermenderi arasynda saýalnama júrgiziledi. Sondaı saýalnamalardyń biriniń qorytyndysy boıynsha «Oılan, tap» baǵdarlamasy dúnıege keldi. Alǵash ret balalar jańalyǵy - «Balapan news» kórermenge jol tartty. Telearna kóptegen sheteldik arnalarmen tyǵyz qarym-qatynas ornatyp úlgerdi.
Jaqyn arada KIKA (Germanııa), Baraem (Katar) telearnalarymen tájirıbe almasý josparlanýda. Alǵash ret «Balapan» Qazaqstan men qazaq ushaǵyn qytaı-koreı-japon birlesken «Áýejaı» annımatsııalyq jobasyna qosý maqsatynda Koreıanyń DPS kompanııasymen ortaq Memorandýmǵa qol qoımaq nıette. Sonymen qatar arna kóptegen halyqaralyq festıvaldarǵa qatysýda. Mysaly, «Kásibiń-Násibiń» tanymdyq baǵdaralamasy men «Sanjar men Qaısar» telehıkaıasy Germanııada ótken Prix jeunesse international búkilálemdik balalar televızııalyq festıvaline qatysty. Germanııanyń ZDF, BBC Kids iri teleradıokorporatsııalarymen tájirıbe almasý jáne baǵdarlamalar taratý setkasyn zertteýge qatysty kelissózder júgizilýde. Kika TV (Germany), Karýsel (Rossııa), Tiji (Frantsııa) syndy sheteldik balalar telearnasynyń baǵdarlama taratý setkasymen tanysa kele, túrli janrlyq baǵytty qamtıtyn «bloktyq» júıege kóshý týraly sheshim qabyldandy. Jańa telemaýsymda kishkentaı kórermender úshin 14 janrlyq baǵytty qamtıtyn 30-ǵa jýyq tyń baǵdarlama ázirlendi. Tuńǵysh ret telearna tapsyrysy boıynsha Motion Capture janrynda úsh serııadan turatyn «Batyrlar» anımatsııalyq serıaly kórsetildi. 2014 jylǵy jospar boıynsha taǵy da 3 serııa jaryqqa shyqpaq. Gonkong Dısneılendinde túsirilimder uıymdastyrý isi daıyndyq ústinde. Bul kórermenderimizdiń qyzyǵýshylyǵyn týdyrady degen senimdemiz. Ol týraly jaqyn arada tolyǵyraq biletin bolasyzdar, delingen habarlamada.
