Búgin - Balalarǵa arnalǵan kitaptardyń halyqaralyq kúni
ASTANA. 2 sáýir. QazAqparat - «Búgin Qazaqstan baspasóz klýbynda dat ertegishisi Hans Krıstıan Andersenniń 2 sáýirdegi týǵan kúnine oraı búkil álem boıynsha Balalarǵa arnalǵan kitaptardyń halyqaralyq kúni atap ótiledi»,
dep habarlady Qazaqstan baspasóz klýbynan.
Osy kúni, ıaǵnı «Balalarǵa arnalǵan kitaptardyń halyqaralyq kúnine oraı Qazaqstanda «Balaýsa» balalar ádebı shyǵarmalarynyń baıqaýy bastalady» degen taqyryp boıynsha baspasóz májilisi ótedi. Sondaı-aq Qazaqstannyń Jazýshylar odaǵy «Balaýsa» atty balalar ádebı shyǵarmalarynyń baıqaýy jóninde habarlap, qalamgerler Qazaqstandaǵy balalarǵa arnalǵan kitaptar naryǵynyń jaǵdaıy týraly aqparatpen bólisedi.
Atalmysh baıqaýdyń maqsaty - memlekettik tilde qazirgi zamanǵy balalar ádebıetiniń damýyna járdemdesý, balalarǵa arnalǵan shyǵarmalar avtorlaryna qoldaý kórsetý jáne balalardyń boıynda otansúıgishtik, bilimqumarlyq, oqýǵa degen súıispenshilikti tárbıeleý.
Baıqaýǵa qatysatyn shyǵarmalar 2012 jyldyń 31 jeltoqsanyna deıin qabyldanatyn bolady. Baıqaý qorytyndysy 2013 jyldyń 2 sáýirinde jarııalanady.
