Búgin Ázerbaıjanda Prezıdent saılaýy ótedi
Aıta keterligi, kezekti prezıdenttik saılaý 2018 jyldyń kúzinde ótýi tıis bolatyn. Alaıda, Ázerbaıjan prezıdenti Ilham Álıevtyń prezıdenttik saılaýdy 2018 jyldyń 11 sáýirine taǵaıyndaý týraly ókimi 5 aqpan kúni jarııalandy.
Saılaýdy merziminen buryn, kezekten tys tártibinde ótkizý negizinen Ázerbaıjanda saıası jáne áleýmettik-ekonomıkalyq reformalardy júzege asyrýǵa qosymsha múmkindikter beretinimen túsindirilgen. Sondaı-aq, bıylǵy jyldyń ekinshi jartysynda Ázerbaıjanda joǵary deńgeıdegi birqatar halyqaralyq is-sharalardy uıymdastyrý josparlanyp otyrǵany aıtylady. Sonyń eń bastysy - Ázerbaıjan demokratııalyq respýblıkasy qurylǵanynyń 100 jyldyǵy. Atalǵan deńgeıi joǵary mereke de kúzge belgilengen. Osyndaı aýqymdy sharalardy negizge alǵan Memleket basshysy kezekten tys saılaý ótkizýdi jarııalaǵan bolatyn.
Saılaýshylar prezıdentke úmitker 8 kandıdat boıynsha saılaý quqyqtaryn júzege asyratyn bolady. Kandıdattar qatarynda bılik partııasy - «Enı Azerbaıdjan» partııasy usynǵan eldiń qazirgi prezıdenti Ilham Álıev, ózin-ózi usynýshy Zahıda Orýdja, Sotsıal-demokratııalyq partııasynyń ókili Araz Alızade, Birtutas halyq maıdany partııasynan Gýdrat Gasangýlıev, «Ulttyq órleý qozǵalysy» partııasynan usynylǵan Farad Gýlıev, «Jańa Mýsavat» partııasynan Hafız Gýdjıev, Ulttyq maıdan toptarynyń ókili Razı Nýrýllaev, Ázerbaıjan demokratııalyq partııasynan Sardar Mamedov bar.
Bul jolǵy saılaýdyń eń basty ereksheligi - prezıdent burynǵydaı bes jyl merzimge emes, jeti jyl merzimge saılanady. Óıtkeni 2016 jyldyń kúzindegi Konstıtýtsııaǵa ózgerister men tolyqtyrýlar engizý týraly jalpyhalyqtyq referendýmda prezıdenttiń ókilettik merzimi jeti jylǵa uzartyldy.
