Búgin - áıgili taekvondashy Mustafa Óztúriktiń týǵan kúni
ALMATY. 24 qarasha. QazAqparat /Ádilet Musahaev/ - Búgin - áıgili sportshy, taekvondodan qara belbeýdiń 6-dan ıegeri, Qazaqstan Respýblıkasynyń Taekvondo federatsııasynyń negizin qalaýshy, halyqaralyq dárejedegi jattyqtyrýshy Mustafa Óztúriktiń týǵan kúni.
1954 jyldyń 24 qarashasynda dúnıege kelgen ataqty sportshy Ystambuldaǵy orta mektepti támamdaǵannan soń, Taıvandaǵy eksperımentaldy ýnıversıtetti jáne sol eldegi Halyqaralyq qatynastar ýnıversıtetiniń jýrnalıstıka fakýltetin qosa bitirgen. Osy elde júrip káristerdiń kóne sport óneri - taekvondony úırenedi. Keıin Germanııanyń Keln, Mıýnhen jáne Túrkııanyń Ystambul qalalarynda óziniń taekvondo mektebin ashqan.
1990-jyldary elimizge shyǵys jekpe-jegi - taekvondo sportyn alyp kelgen Mustafa Óztúrik edi. Ol Almatyda alǵash taekvondo sport mektebin ashyp, osy sport túrin joǵary deńgeıge kóteredi. Qazirgi tańda elimizdiń ár aımaǵynda taekvondo mektepteri ashylyp, 20 myńǵa jýyq jas Mustafanyń izin jalǵastyrýda. Arman Shilmanov syndy shákirti Gýandjoýda ótip jatqan Azııa oıyndarynda taekvondodan qola medalǵa qol jetkizip, el mereıin asqaqtatty.
2000-jyly Almaty qalasynda Mustafa Óztúrik atyna kóshe berilip, eskertkish belgi qoıyldy. 2004 jyly 50 jasqa tolǵan mereıtoıy qarsańynda Almaty oblysy Talǵar aýdanynyń Besaǵash aýylynda eskertkishi ashyldy.
