Búgin áıgili ánshi Júsipbek Elebekovtyń ómirden ozǵanyna - 34 jyl
ALMATY. 12 tamyz. QazAqparat /Erlik Erjanuly/ - Qazaqstannyń halyq ártisi Júsipbek Elebekov kózi tiri bolǵanda 28 tamyzda 97 jasqa tolar edi.
1904 jyly Qaraǵandy oblysy Qarqaraly aýdany Qarataý aýylynda ómirge kelgen áıgili mýzyka sheberi 73 jasynda 1977 jyly 12-tamyzda Almatyda dúnıeden ozǵan bolatyn. Ol óziniń óner jolyn 1920-22 jyldary Semeıdegi «Es-aımaq» drama trýppasynyń spektaklderi men kontsertterinen bastaıdy. Odan keıin 1931-35 jyldary Qazaq drama teatrynda, 1935-60 jyldary Qazaq fılarmonııasynda, 1960-77 jyldary «Qazaqkontsert» birlestiginde akterlik-ánshilik qyzmetterdi atqarǵan. Abaı, Aqan seri, Birjan sal, Jaıaý Musa, Balýan Sholaqtyń shyǵarmalaryn nasıhattaýshy boldy. Onyń repertýarynda halyq ánderi men halyq kompozıtorlarynyń ánderinen bólek Qazaqstan sazgerleriniń shyǵarmalary da bar. Ánshiniń oryndaýyndaǵy júzdegen án úlgileri etnografııalyq mýzykalyq jınaqtarǵa enip, ǵylymı zertteý jumystaryna arqaý boldy. 1936, 1958 jyldary Máskeýde ótken Qazaq ádebıeti men óneriniń onkúndigine qatysyp, gastroldik saparmen Qytaı (1950, 1955), Mońǵolııa (1960), Úndistan (1967) sııaqty shet elderdi aralaǵan J.Elebekov ómiriniń sońyna deıin Almatydaǵy estrada-tsırk óneri stýdııasynda ustazdyq qyzmet jasady. Eren eńbegi eleýsiz qalmaı 1942 jyl Qazaqstannyń halyq ártisi ataǵyn alyp, keıin «Lenın», «Qurmet» ordenderimen marapattaldy. 1965 jyly «Qazaqkontsert» birlestigi janynan qurylǵan Almaty estrada-tsırk óneri stýdııasy 1995 jyldan beri Júsipbek Elebekov atyndaǵy Almaty estrada-tsırk óneri koledji dep atalady.
